കോട്ടയ്ക്കല്‍: മൂന്ന് തവണ മത്സരിച്ചവര്‍ക്ക് തദ്ദേശ തെരഞ്ഞെടുപ്പില്‍ അവസരം നല്‍കേണ്ട മുസ്‌ലിം ലീഗ് തീരുമാനം വരുന്ന നിയമസഭ തെരഞ്ഞെടുപ്പിലും നടപ്പാക്കണമെന്നാണ് എന്റെ അഭിപ്രായമെന്നും കെ.എം ഷാജി എം.എല്‍.എ. ഇക്കാര്യത്തില്‍ തീരുമാനം എടുക്കേണ്ടത് പാര്‍ട്ടിയാണ്. തദ്ദേശ തെരഞ്ഞെടുപ്പുമായി ബന്ധപ്പെട്ട് പാര്‍ട്ടി എടുത്ത തീരുമാനത്തെ ആവേശത്തോടെയാണ് ചെറുപ്പക്കാര്‍ ഏറ്റെടുത്തതെന്നും കെ.എം ഷാജി പറഞ്ഞു.

രാഷ്ട്രീയ കൊലപാതകങ്ങളെ എല്ലാ പാര്‍ട്ടികളും തള്ളിപ്പറയണം എന്നാല്‍ നിയമ പരിരക്ഷയും പണവും നല്‍കി കൊലപാതകികളെ സംരക്ഷിക്കുന്ന നിലപാടാണ് സര്‍ക്കാരിന്റേത്. മന്ത്രി കെ.ടി ജലീലിന്റെ നടപടികളെ എം.സി കമറുദ്ദീന്റെ കേസുമായി കൂട്ടിക്കുഴയ്ക്കുന്നതിന്റെ കാര്യമില്ലെന്നും പ്രാദേശിക ചാനലിന് നല്‍കിയ അഭിമുഖത്തില്‍ കെ.എം ഷാജി പറഞ്ഞു.