മൊറട്ടോറിയം പ്രഖ്യാപിച്ച മന്ത്രിസഭാ തീരുമാനത്തിന് ആര്‍.ബി.ഐ അനുമതിയില്ല
ആര്‍.ബി.ഐയുടെ അനുമതി ലഭിച്ചാല്‍ മാത്രമേ നടപ്പാക്കാന്‍ സാധിക്കുകയുള്ളൂ
തിരുവനന്തപുരം: നെയ്യാറ്റിന്‍കരയില്‍ അമ്മയും മകളും ആത്മഹത്യ ചെയ്ത സംഭവത്തിനു പിന്നാലെ വായ്പകള്‍ക്കു മേലുള്ള മൊറട്ടോറിയം സംബന്ധിച്ച് മന്ത്രിമാര്‍ നടത്തിയ പ്രസ്താവനകള്‍ വസ്തുതാ വിരുദ്ധമാണെന്ന് ബാങ്ക് യൂനിയനുകളുടെ പ്രതിനിധികള്‍. 2010ല്‍ കിട്ടാക്കടമായി മാറിയ ഭവന വായ്പക്ക് പ്രളയത്തിന്റെ പശ്ചാത്തലത്തില്‍ പ്രഖ്യാപിച്ച മൊറട്ടോറിയം ബാധകമാകില്ലെന്ന് യൂനിയന്‍ പ്രതിനിധികള്‍ ചൂണ്ടിക്കാട്ടുന്നു.

പ്രളയത്തെ തുടര്‍ന്ന് 2018 ജൂലൈ മുതല്‍ 12 മാസത്തേക്കാണ് ജപ്തി നടപടികള്‍ക്ക് മൊറട്ടോറിയം പ്രഖ്യാപിച്ചിരുന്നത്. അതിനു മുന്‍പ് കിട്ടാക്കടമായ വായ്പകള്‍ക്ക് ഇത് ബാധകമാകില്ല. ഈ വര്‍ഷം ഡിസംബര്‍ 31 വരെ സംസ്ഥാനത്തെ എല്ലാ വായ്പകള്‍ക്കും മേലുള്ള ജപ്തി നടപടികള്‍ക്കും മൊറട്ടോറിയം പ്രഖ്യാപിച്ച മന്ത്രിസഭാ തീരുമാനത്തിന് ഇതുവരെയും റിസര്‍വ് ബാങ്കിന്റെ അനുമതി ലഭിച്ചിട്ടില്ലെന്നും പ്രതിനിധികള്‍ വ്യക്തമാക്കി. ബാങ്ക് വായ്പകളുമായി ബന്ധപ്പെട്ട സംസ്ഥാന സര്‍ക്കാര്‍ തീരുമാനങ്ങള്‍ക്ക് ആര്‍.ബി.ഐയുടെ അനുമതി ലഭിച്ചാല്‍ മാത്രമേ ബാങ്കുകള്‍ക്ക് നടപ്പാക്കാന്‍ സാധിക്കുകയുള്ളൂ.

നെയ്യാറ്റിന്‍കരയിലെ ദാരുണ സംഭവത്തിനു പിന്നാലെ മൊറട്ടോറിയം നിലനില്‍ക്കുന്ന സംസ്ഥാനത്ത് എങ്ങനെ ബാങ്കുകള്‍ ജപ്തി നടപടികളുമായി മുന്നോട്ടു പോകുമെന്ന ചോദ്യം ചില മന്ത്രിമാര്‍ ഉന്നയിച്ചിരുന്നു. ഭവന വായ്പയുമായി ബന്ധപ്പെട്ട് കിടപ്പാടം ജപ്തി ചെയ്യരുതെന്നും ചിലര്‍ അഭിപ്രായം പറഞ്ഞു. സംസ്ഥാനത്ത് 34,000ത്തോളം കോടി രൂപയാണ് ഭവന വായ്പയായി ബാങ്കുകള്‍ നല്‍കിയിരിക്കുന്നത്. ഈ വായ്പകള്‍ കിട്ടാക്കടമായാല്‍ തിരിച്ചുപിടിക്കുന്നതിന് നടപടിയെടുക്കണമെന്നതാണ് റിസര്‍വ് ബാങ്ക് നിര്‍ദേശം. ബാങ്കിങ് മേഖലയിലെ താഴേത്തട്ടിലുള്ള ഉദ്യോഗസ്ഥര്‍ ഇക്കാര്യത്തില്‍ നിസ്സഹായരാണെന്നും യൂനിയന്‍ പ്രതിനിധികള്‍ വ്യക്തമാക്കി.