പൊന്നാനി: പൊന്നാനിയിലും പരിസര പ്രദേശങ്ങളിലും പിടിച്ചുപറിയും മാല മോഷണവും പതിവാകുന്നു. കെ.എസ്.ആര്‍.ടി.സി ബസില്‍ നിന്നും മാല മോഷ്ടിക്കാന്‍ ശ്രമിച്ച യുവതിയെ പൊലിസ് പിടികൂടി. പൊന്നാനി ചമ്രവട്ടം ജങ്ഷനില്‍ ബസില്‍ വെച്ച് ഇന്നലെ സ്വര്‍ണമാല മോഷ്ടിക്കാന്‍ ശ്രമിച്ച യുവതിയെ പൊലിസ് പിടികൂടി.
ഉച്ചയ്ക്ക് ഒന്നരയോടെയായിരുന്നു സംഭവം. പൊന്നാനിയില്‍ നിന്നും തിരൂര്‍ വഴി മഞ്ചേരിയിലേക്ക് പോവുകയായിരുന്ന കെ.എസ്.ആര്‍.ടി.സി.ബസിലാണ് മോഷണം നടന്നത്. പുറത്തൂര്‍ കാവിലക്കാട് സ്വദേശിയായ ഒന്നര വയസുകാരിയുടെ ഒരു പവന്‍ സ്വര്‍ണാഭരണമാണ് മോഷണം പോയത്. മാല നഷ്ടമായ വിവരം കുഞ്ഞിന്റെ അമ്മ ബസ് ജീവനക്കാരോട് പറഞ്ഞതോടെ ബസ് ചമ്രവട്ടം ജങ്ഷനിലെ സ്റ്റോപ്പില്‍ നിര്‍ത്തിയിട്ടു. പിടിക്കപ്പെടുമെന്നായപ്പോള്‍ യുവതി മോഷ്ടിച്ച മാല ബസില്‍ നിന്നും പുറത്തേക്ക് വലിച്ചെറിഞ്ഞു. ഇതേ സമയം ഇതുവഴി വന്ന പെരുമ്പടപ്പ് എസ്.ഐ സംഭവത്തില്‍ ഇടപെട്ടതിനെത്തുടര്‍ന്ന് മാല റോഡില്‍ കിടക്കുന്നത് കണ്ടെത്തിയത്. തുടര്‍ന്ന് ബസ് പൊന്നാനി പൊലിസ് സ്‌റ്റേഷനിലേക്ക് കൊണ്ടുപോവുകയും യാത്രക്കാരെ ചോദ്യം ചെയ്യുകയും ചെയ്തു. ഇതിനിടെയാണ് യാത്രക്കാരിയായ യുവതി മോഷണം നടത്തിയത് സമ്മതിച്ചത്. തുടര്‍ന്ന് യുവതിയെ പൊലിസ് താക്കീത് നല്‍കി വിട്ടയച്ചു. മേഖലയില്‍ മാല മോഷണം പതിവായതായാണ് ആരോപണം.