നാഗര്‍കോവില്‍: കൂടംകുളം സമരനായകന്‍ എസ്.പി. ഉദയകുമാര്‍ കരുതല്‍ തടങ്കലില്‍. ഇന്ന് രാവിലെ എസ്.പി ഉദയകുമാറിന്റെ വീട്ടിലെത്തിയ നാഗര്‍കോവില്‍ പോലിസ് അദ്ദേഹത്തെ പോലിസ് സ്‌റ്റേഷനിലേക്ക് കൊണ്ടുപോവുകയായിരുന്നു. ഇക്കാര്യം അദ്ദേഹം ഫേസ്ബുക്ക് പോസ്റ്റിലൂടെ അറിയിച്ചിരുന്നു.

കഴിഞ്ഞ വര്‍ഷം തൂത്തുക്കുടിയില്‍ സ്‌റ്റെര്‍ലൈറ്റ് ഫാക്ടറിക്കെതിരേ പ്രതിഷേധിച്ചവര്‍ക്കുനേര്‍ക്കുണ്ടായ വെടിവയ്പിന്റെ വാര്‍ഷികത്തോടനുബന്ധിച്ചുള്ള പരിപാടിയില്‍ പങ്കെടുക്കുന്നത് തടയാനാണ് ഉദയകുമാറിനെ പോലിസ് കസ്റ്റഡിയിലെടുത്തത്. ഇന്നലെ രാത്രിമുതല്‍ അദ്ദേഹക്കിന്റെ വീടിനു സമീപം പോലിസ് നിരീക്ഷിച്ചുവരികയായിരുന്നെന്നും വിവരമുണ്ട്.

എസ്പി ഉദയകുമാറിനെ എത്രയും വേഗം മോചിപ്പിക്കണമെന്ന് എന്‍എപിഎം അടക്കമുള്ള സംഘടനകള്‍ ആവശ്യപ്പെട്ടു. പോലിസ് നടപടിയെ പീപ്പിള്‍സ് മൂവ്‌മെന്റ് എഗൈന്‍സ്റ്റ് ന്യൂക്ലിയര്‍ എനര്‍ജി അപലപിച്ചു.