ചട്ടഞ്ചാല്‍: സമസ്ത കേരള ജംഇയ്യത്തുല്‍ മുഅല്ലിമീന്‍ സംസ്ഥാനതല ഇസ്‌ലാമിക് കലാമേളയുടെ വിളംബര ജാഥ ഇന്ന് വൈകുന്നേരം നാലിന് നടക്കും. കാസര്‍കോട്, കാഞ്ഞങ്ങാട് എന്നീ രണ്ടു മേഖലകളാക്കി കാസര്‍കോടും, കാഞ്ഞങ്ങാട്ടും നടക്കുന്ന വിളംബര ജാഥയില്‍ മദ്‌റസ വിദ്യാര്‍ഥികളുടെ ദഫ്,സ്‌കൗട്ട് എന്നിവയുടെ അകമ്പടി ഉണ്ടാകും.
കലാമേളയുടെ ഭാഗമായി മാഹിനാബാദിലെ മലബാര്‍ ഇസ്‌ലാമിക് കോംപ്ലക്‌സില്‍ പ്രത്യേകം തയാറാക്കുന്ന സി.എം ഉസ്താദ് നഗറിലാണ് ഈമാസം 12 മുതല്‍ 14 വരെ സംസ്ഥാനതല ഇസ്‌ലാമിക് കലാമേള നടക്കുന്നത്.
കലാമേളയുടെ പ്രധാന വേദിയുടെ പന്തലിന്റെ കാല്‍ നാട്ടല്‍ ചടങ്ങ് ഇന്നലെ രാവിലെ പതിനൊന്നിന് മലബാര്‍ ഇസ്‌ലാമിക് കോംപ്ലക്‌സ് മൈതാനിയില്‍ നടന്നു.
കാല്‍ നാട്ടല്‍ കര്‍മം സ്വാഗത സംഘം ചെയര്‍മാന്‍ യു.എം അബ്ദുല്‍ റഹിമാന്‍ മൗലവി നിര്‍വഹിച്ചു. ചടങ്ങില്‍ സി.കെ.കെ മാണിയൂര്‍, അബ്ദുല്‍ അസീസ് അശ്‌റഫി, സാലൂദ് നിസാമി, സയ്യിദ് ഹുസൈന്‍ തങ്ങള്‍, സുലൈമാന്‍ നിസാമി, കെ.എം സൈനുദ്ധീന്‍ ഹാജി, റഫീഖ് അങ്കക്കളരി, ടി.പി. അലിഫൈസി, ടി.കെ. ഹംസ കട്ടക്കാല്‍, ഹമീദ് ഫൈസി കൊല്ലമ്പാടി, എസ.പി സ്വലാഹുദ്ധീന്‍, റസാഖ് അര്‍ഷദി, സലാം ഫൈസി പേരാല്‍, റൗഫ് ബാവിക്കര, റൗഫ് ഉദുമ എന്നിവര്‍ സംബന്ധിച്ചു. കലാമേളയുടെ ഭാഗമായി മഞ്ചേശ്വരം, തൃക്കരിപ്പൂര്‍ എന്നിവിടങ്ങളില്‍ നിന്ന് പ്രചാരണ വാഹന ജാഥയും ഉണ്ടാകും. ഇരുജാഥകളും രണ്ടുദിവസത്തെ പ്രചാരണത്തിന് ശേഷം സമ്മേളന നഗരിയില്‍ സമാപിക്കും. കലാമേളയുടെ ഭാഗമായി സുപ്രഭാതം വഴി നടത്തുന്ന ക്വിസ് മത്സരത്തിന് മികച്ച പ്രതികരണമാണ് ലഭിക്കുന്നത്.