മുക്കം: അടിക്കടിയുണ്ടാവുന്ന ഇന്ധനവില വര്‍ധനക്കെതിരേ വേറിട്ട സമരവുമായി ഡി.വൈ.എഫ്.ഐ മുക്കം മേഖല കമ്മിറ്റി. മുക്കം ബസ് സ്റ്റാന്റില്‍ ബസിന് പകരം 'പാളവണ്ടി'യിറക്കി അതില്‍ യാത്രക്കാരെ കയറ്റിയായിരുന്നു പ്രതിഷേധം സംഘടിപ്പിച്ചത്.
പ്രകടനമായെത്തിയ പ്രവര്‍ത്തകര്‍ നഗരസഭ കൗണ്‍സിലര്‍ മുക്കം വിജയനേയും സ്റ്റാന്റിലെത്തിയ യാത്രക്കാരേയും പാളയിലിരുത്തി സ്റ്റാന്റിലൂടെ വലിച്ചു നടക്കുകയായിരുന്നു. പരിപാടി ഡി.വൈ.എഫ്.ഐ മേഖലാ സെക്രട്ടറി എ.പി ജാഫര്‍ ശരീഫ് ഉദ്ഘാടനം ചെയ്തു.
അനൂപ് മഠത്തില്‍ അധ്യക്ഷനായി. ജയപ്രസാദ്, നോര്‍മര്‍ മാമ്പറ്റ, റൈനീഷ്, അതുല്‍ കച്ചേരി, ജിന്‍ഷു, ഷെജില്‍, കെ.കെ സജി തുടങ്ങിയവര്‍ നേതൃത്വം നല്‍കി.