തളിപ്പറമ്പ്: പൂവ്വം-പന്നിയൂര്‍ റോഡില്‍ പ്രവര്‍ത്തിക്കുന്ന പന്നിഫാമിനെതിരേ നാട്ടുകാരുടെ പരാതി ശക്തമാകുന്നു. ദുര്‍ഗന്ധവും ഫാമിലെ അവശിഷ്ടങ്ങള്‍ പക്ഷികള്‍ കൊത്തി കിണറുകളിലും തൊടികളിലും ഇടുന്നതും വലിയ ആരോഗ്യ പ്രശ്‌നങ്ങളുയര്‍ത്തുന്നു എന്നു നാട്ടുകാര്‍ പറയുന്നു.
ഫാമിന് സമീപത്തുള്ള അങ്കണവാടിയിലെ കുട്ടികള്‍ക്ക് ജനാലകളും വാതിലും അടച്ചാല്‍ മാത്രമെ ഇരിക്കാനാകൂ എന്നാണ് ഇവര്‍ പറയുന്നത്. 15 വര്‍ഷമായ ഫാമിനെതിരേ ആരംഭഘട്ടത്തില്‍ തന്നെ പരാതി ഉയര്‍ന്നിരുന്നു. അധികൃതര്‍ ഫാമിനെതിരേ നടപടി സ്വീകരിക്കുന്നതുവരെ പ്രതിഷേധവുമായി മുന്നോട്ടുപോകുമെന്ന് നാട്ടുകാര്‍ പറഞ്ഞു.
എന്നാല്‍ പ്രദേശത്തെ ഭൂമാഫിയകളുടെ അടിസ്ഥാനരഹിതമായ ആരോപണമാണിതെന്നും ഫാമിനു സമീപത്തായുള്ള സ്ഥലം വിറ്റുപോകാത്തതിന്റെ ദേഷ്യമാണെന്നും ഫാം ഉടമ ഷിബു പറയുന്നു.