പാറ്റ്‌ന: ബിഹാറില്‍ നടക്കാനിരിക്കുന്ന നിയമസഭാ തെരഞ്ഞെടുപ്പില്‍ ജെ.ഡി.യു സ്ഥാനാര്‍ഥിയായി മത്സരിക്കാന്‍ ഡി.ജി.പി സ്ഥാനം രാജിവച്ച ഗുപ്‌തേശ്വര്‍ പാണ്ഡെയ്ക്ക് ഒടുവില്‍ മത്സരിക്കാന്‍ സീറ്റ് കിട്ടിയില്ല.

 ബക്‌സര്‍ മണ്ഡലത്തില്‍നിന്നു ജെ.ഡി.യു പ്രതിനിധിയായി മത്സരിക്കാനായിരുന്നു ഗുപ്‌തേശ്വര്‍ പാണ്ഡെയുടെ നീക്കം. എന്നാല്‍, ഈ സീറ്റിലടക്കം സ്ഥാനാര്‍ഥികളെ പ്രഖ്യാപിച്ചെങ്കിലും, ഗുപ്‌തേശ്വര്‍ പാണ്ഡെയുടെ പേരില്ല.

അതേസമയം, മുന്‍ ഡി.ജി.പി കണ്ണുവച്ച ബക്‌സറില്‍ സ്ഥാനാര്‍ഥിയായി മത്സരിക്കുന്നത് ബിഹാറിലെ മുന്‍ പൊലിസ് കോണ്‍സ്റ്റബിളാണെന്നതും കൗതുകമായി. എന്‍.ഡി.എയിലെ സീറ്റുവിഭജനത്തില്‍ ബക്‌സര്‍ മണ്ഡലം ബി.ജെ.പിക്കാണ് ലഭിച്ചത്. ഇവിടെ മുന്‍ പൊലിസ് കോണ്‍സ്റ്റബിള്‍ പരശുറാം ചതുര്‍വേദിയാണ് സ്ഥാനാര്‍ഥി. തെരഞ്ഞെടുപ്പില്‍ മത്സരിക്കാനായി ദിവസങ്ങള്‍ക്കു മുന്‍പ് ഡി.ജി.പി സ്ഥാനം രാജിവച്ച ഗുപ്‌തേശ്വര്‍ പാണ്ഡെ, ജെ.ഡി.യുവില്‍ അംഗത്വമെടുക്കുകയും ചെയ്തിരുന്നു.