ചേനോളി അക്രമം; പ്രതികള്‍ പൊലിസ്
സംരക്ഷണത്തില്‍ കഴിയുന്നുവെന്ന് മുസ്‌ലിം ലീഗ്
പേരാമ്പ്ര: ചേനോളിയില്‍ വീടാക്രമിച്ച കേസിലെ പ്രതികള്‍ പൊലിസ് സംരക്ഷണത്തില്‍ കഴിയുകയാണെന്ന് മുസ്‌ലിം ലീഗ് നൊച്ചാട് പഞ്ചായത്ത് കമ്മിറ്റി ആരോപിച്ചു.
കഴിഞ്ഞദിവസം പേരാമ്പ്ര പൊലിസ് സ്റ്റേഷനിലെ പൊലിസിനോടൊപ്പം കേസിലെ ഒരു പ്രതി സഞ്ചരിക്കുകയും പരാതിക്കാരിയെയും സഹോദരപുത്രിയെയും നടുറോഡില്‍വച്ച് ഭീഷണിപ്പെടുത്തുകയും ചെയ്തത് ഗൗരവമേറിയതാണ്.
പ്രതികളെ അറസ്റ്റ് ചെയ്യാതെ പൊലിസ് ഒത്തുകളിക്കുകയാണ്. നൊച്ചാട് മുനീറിന്റെയും കുണ്ടുങ്ങല്‍ അഹമ്മദിന്റെയും വീട് ആക്രമിച്ച കേസിലും കോഴി ഫാം കത്തിച്ച് കോഴികളെ ചുട്ടുകൊന്ന കേസിലും ഒരു പ്രതിയെ മാത്രമേ അറസ്റ്റ് ചെയ്തിട്ടുള്ളൂ. ചേനോളിയിലെ എടോത്തറമ്മല്‍ റഫീഖിന് മര്‍ദനമേറ്റ കേസില്‍ രണ്ടുപേരെ യാതൊരു അന്വേഷണമോ ചോദ്യംചെയ്യലുകളോ ഇല്ലാതെ വധശ്രമം ഉള്‍പ്പെടെയുള്ള വകുപ്പുകള്‍ ചേര്‍ത്ത് കേസില്‍ കുടുക്കിയത് പുനഃപരിശോധിക്കണമെന്നും യോഗം ആവശ്യപ്പെട്ടു.
ആര്‍.കെ മുനീര്‍ അധ്യക്ഷനായി. ടി.കെ ഇബ്രാഹിം, സി. അമ്മദ്കുട്ടി ഹാജി, ഹംസ മാവിലാട്ട്, മുഹമ്മദ് സിറാജ്, സലിം മിലാസ് സംസാരിച്ചു.