മട്ടാഞ്ചേരി: എക്കലും പോളപ്പായലും മൂലം വേമ്പനാട് കായല്‍ നശിക്കുമ്പോള്‍ സംരക്ഷണത്തിനായി മത്സ്യത്തൊഴിലാളി സമൂഹം കൈകോര്‍ക്കുന്നു. കൈയേറ്റവും മാലിന്യ നിക്ഷേപവും മൂലം കായലിന്റെ ജൈവ മത്സ്യസമ്പത്ത് നശിക്കുന്ന അവസ്ഥയാണ്. എക്കലടിഞ്ഞ് നീരൊഴുക്ക് നിലച്ചതും വേമ്പനാട് കായലിന്റെ നാശത്തിന് വഴിയൊരുക്കുന്നു. ഇതിനെല്ലാം ശാശ്വതമായ പരിഹാരം ലക്ഷ്യമിട്ടാണ് കക്ഷി രാഷ്ട്രീയ ഭേദമന്യേ മത്സ്യതൊഴിലാളി സമൂഹം കൈകോര്‍ക്കുന്നത്.
അശാസ്ത്രീയമായ പാലം നിര്‍മാണവും മത്സ്യബന്ധന രീതികളുമെല്ലാം കായലിനെ നശിപ്പിച്ച് കൊണ്ടിരിക്കുന്ന സാഹചര്യമാണുള്ളത്. വര്‍ഷകാലം ആയതോടെ പോളപ്പായലും കായലില്‍ അടിഞ്ഞ് കൂടിയിരിക്കുകയാണ്.
ഇത് മൂലം കായലിന്റെ ആവാസ വ്യവസ്ഥ പൂര്‍ണ്ണമായും തകരുകയും മത്സ്യലഭ്യത ഗണ്യമായി കുറയുകയും ചെയ്തു. ഇതോടെ മത്സ്യതൊഴിലാളികളുടെ ഉപജീവനമാര്‍ഗം കൂടി പ്രതിസന്ധിയിലായിരിക്കുകയാണ്. ഈ സാഹചര്യത്തില്‍ ചൊവ്വാഴ്ച രാവിലെ ഇടക്കൊച്ചി പണ്ഡിറ്റ് കറുപ്പന്‍ ഓഡിറ്റോറിയത്തില്‍ കായല്‍ സംരക്ഷണ സമിതിയുടെ നേതൃത്വത്തില്‍ ഏകദിന ശില്‍പ്പശാല സംഘടിപ്പിക്കാന്‍ തീരുമാനിച്ചു. മന്ത്രിമാരും വിവിധ രാഷ്ട്രീയ കക്ഷി നേതാക്കളും ജനപ്രതിനിധികളും ശില്‍പശാലയില്‍ പങ്കെടുക്കുമെന്ന് നേതാക്കള്‍ പറഞ്ഞു.
വേമ്പനാട് കായലും ഇതിന്റെ കൈവഴികളായ പെരുമ്പടപ്പ്, കുമ്പളങ്ങി, കല്ലഞ്ചേരി,പള്ളുരുത്തി കായലുകളും സര്‍വനാശത്തെ നേരിടുകയാണ്.പോളപ്പായല്‍ നിര്‍മാര്‍ജ്ജനം നടത്തേണ്ടത് തികച്ചും ശാസ്ത്രീയമായി വേണമെന്നാണ് മല്‍സ്യതൊഴിലാളി സമൂഹം ഒന്നടങ്കം ആവശ്യപ്പെടുന്നത്. പെരുമ്പടപ്പ് കായലിന്റെ ഗണ്യമായ ഭാഗം എക്കലടിഞ്ഞ് കരയായും മാറിയിരിക്കുകയാണ്.
സംസ്ഥാനത്തെ ഏറ്റവും വലിയ മത്സ്യപ്രജനന പ്രക്രിയ നടക്കുന്നത് വേമ്പനാട് കായലിലും സമീപത്തുമാണെന്നും വിദഗ്ധ പഠനങ്ങള്‍ തെളിയിക്കുമ്പോഴും കായലിലേക്ക് നിരന്തരം ഒഴുക്കുന്ന ഫാക്ടറി മാലിന്യങ്ങളും അജൈവ മാലിന്യങ്ങളും വന്‍ തോതില്‍ തള്ളുന്നത് ആശങ്കക്കിടയാക്കുന്നു.
ശില്‍പശാലയില്‍ സംസ്ഥാന ഫിഷറീസ് വകുപ്പ് മന്ത്രി ജെ മേഴ്‌സി കുട്ടിയമ്മ, പനങ്ങാട് ഫിഷറീസ് സര്‍വ്വകലാശാല വൈസ് ചാന്‍സലര്‍ ഡോക്ടര്‍ എ രാമചന്ദ്രന്‍, പ്രൊഫസര്‍ എസ് ബിജോയ് ചന്ദ്രന്‍, ഡോക്ടര്‍ ജി നാഗേന്ദ്ര പ്രഭു, പി സഹദേവന്‍, ഡോക്ടര്‍ ഗോപിനാഥ് പനങ്ങാട് തുടങ്ങിയവര്‍ വിവിധ വിഷയങ്ങളെ സംബന്ധിച്ച് ചര്‍ച്ചകള്‍ നയിക്കും.