ദമാം: കിഴക്കന്‍ പ്രവിശ്യയിലെ ജുബൈലില്‍ സഹോദരങ്ങളുടെ മുറിയില്‍ കയറിയ കള്ളന്‍ പാസ്‌പോര്‍ട്ടും വിലപ്പെട്ട വസ്തുക്കളും മോഷ്ടിച്ചു. ജുബൈല്‍ സിറ്റിക്കടുത്ത് ഹൈപ്പര്‍ പാണ്ടക്ക് സമീപം സിഗ്‌നലിനടുത്ത കെട്ടിടത്തില്‍ താമസിക്കുന്ന കോഴിക്കോട് കുന്നമംഗലം പയിമ്പ്ര സ്വദേശികളായ സിദ്ധീഖ്, അബ്ദുറഹീം എന്നിവരുടെ മുറിയില്‍ നിന്നുമാണ് സാധനങ്ങള്‍ മോഷ്ടിച്ചത്. ഇരുവരും ജുബൈല്‍ സമസ്ത ഇസ്‌ലാമിക് സെന്റര്‍ സജീവ പ്രവര്‍ത്തകരാണ്.

ജുമുഅഃ സമയത്ത് റൂമില്‍ ആരുമില്ലെന്ന് ബോധ്യപ്പെട്ട തസ്‌കരന്‍ ചുമരിലെ ജനല്‍ പാളി നീക്കിയാണ് ഉള്ളില്‍ കയറിയത്. മുറിയില്‍ ഉണ്ടായിരുന്ന രണ്ടു മൊബൈല്‍, ടാബ്, ബാഗില്‍ ക്ഷിച്ചിരുന്ന പാസ്‌പോര്‍ട്ട്, മറ്റു രാജ്യങ്ങളുടെ ഏതാനും കറന്‍സികള്‍ എന്നിവയാണ് നഷ്ടപ്പെട്ടത്. അടുത്തിടെ നാട്ടിലേക്ക് ലീവിന് പോകാനായുള്ള ഒരുക്കത്തിലായിരുന്നു സഹോദരങ്ങളില്‍ ഒരാള്‍. ഇതിടെയാണ് ഇതിനായി കരുതി വെച്ചിരുന്ന പണമടക്കമുള്ള വിലപ്പെട്ട സാധനങ്ങള്‍ മോഷ്ടിക്കപ്പെട്ടത്.

പോലീസില്‍ പരാതി നല്‍കിയിട്ടുണ്ട്. കെട്ടിടത്തിലെ സി സി ടി വി പരിശോധിച്ചതില്‍ കറുത്ത രൂപമുള്ള സ്വദേശിയാണെന്നാണ് വ്യക്തമാകുന്നതെന്നു ഇവര്‍ പറഞ്ഞു. കെട്ടിടങ്ങളിലെ ജനലുകളില്‍ സുരക്ഷാ കമ്പികള്‍ ഇല്ലാത്തത് കള്ളന്മാര്‍ക്ക് എളുപ്പത്തില്‍ ജനല്‍ ഡോര്‍ തുറന്നു അകത്ത് കടക്കാന്‍ സഹായിക്കുമെന്നതിനാല്‍ പ്രവാസി സുഹൃത്തക്കള്‍ കരുതിയിരിക്കണമെന്ന് ഇവര്‍ ഉണര്‍ത്തി. വിവരം ലഭിക്കുന്നവര്‍ 0554667205 എന്ന നമ്പറില്‍ ബന്ധപ്പെടണം.