കുറ്റിപ്പുറം: ഭാരതപ്പുഴയുടെ സംരക്ഷണത്തിനായി കര്‍മപരിപാടികള്‍ ആവിഷ്‌കരിച്ചതായി മന്ത്രി കെ.ടി ജലീല്‍.
മിനി പമ്പയില്‍ ചേര്‍ന്ന ഉന്നതതല അവലോകന യോഗത്തിന് ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. മണല്‍ക്കടത്ത് തടയുന്നതിനായി ബോധവല്‍ക്കരണ പ്രചരണ പരിപാടികളും കര്‍ശന നിയമ നടപടികളും നടപ്പാക്കും. നദീതീര വാര്‍ഡുകളില്‍ പുഴ സംരക്ഷണത്തിനായി പ്രത്യേക ഗ്രാമസഭകള്‍ ചേരും.
റവന്യു, പോലീസ്, പഞ്ചായത്ത് ഉദ്യോഗസ്ഥര്‍ പങ്കെടുക്കുന്ന ഗ്രാമസഭകളില്‍ പുഴ സംരക്ഷണത്തിനായി കര്‍മസേന രൂപീകരിക്കുന്നതാണ്. പ്രധാന സ്ഥലങ്ങളില്‍ പഞ്ചായത്ത്, റവന്യു അധികൃതരുടെ സഹകരണത്തോടെ നിരീക്ഷണ ക്യാമറകള്‍ സ്ഥാപിക്കും.
പൊലിസ്,റവന്യൂ സംയുക്ത സംഘം ദിനേ പുഴയില്‍ പട്രോളിംഗ് നടത്തും. മണല്‍ സംഭരിക്കുന്ന വീടിന്റെയും ഭൂമിയുടെയും ഉടമകള്‍ക്ക് ആദ്യം മുന്നറിയിപ്പ് നോട്ടിസ് നല്‍ക്കും. കുറ്റം ആവര്‍ത്തിക്കപ്പെട്ടാല്‍ കര്‍ശന നിയമ നടപടികള്‍ സ്വീകരിക്കുന്നതാണ്. പ്രധാന ജങ്ഷനുകളില്‍ സ്ഥിരം പൊലിസ് പിക്കറ്റിംഗ് ഏര്‍പ്പെടുത്തും.
കടവുകളില്‍ ബാരിക്കേഡും സ്ഥാപിക്കുന്നതാണ്. മണല്‍ കടത്തിന് പിടികൂടുന്നവരെ ജാമ്യമില്ലാക്കുറ്റം ചുമത്തി ശിക്ഷാനടപടികള്‍ കര്‍ശനമായി നടപ്പാക്കുന്നതാണ്. മണല്‍ വാരുന്ന അന്യസംസ്ഥാന തൊഴിലാളികളുടെ വിവരശേഖരണം നടത്തി കര്‍ശനമായ ശിക്ഷാ നടപടികളും സ്വീകരിക്കുമെന്നും മന്ത്രി പറഞ്ഞു.
യോഗത്തില്‍ പൊന്നാനി തഹസില്‍ദാര്‍ അന്‍വര്‍ സാദത്ത്, തിരൂര്‍ ഡി.വൈ.എസ്.പി ബിജു ഭാസ്‌ക്കര്‍, തവനൂര്‍ പഞ്ചായത്ത് പ്രസിഡന്റ് പി.പി നാസര്‍, ടി.വി ശിവദാസ് ബാബു, അബ്ദുല്‍ ജബ്ബാര്‍ സംസാരിച്ചു.