പെരിന്തല്‍മണ്ണ: സ്‌കൂളില്‍ അതിക്രമിച്ച് കയറി അധ്യാപകനെ മര്‍ദിച്ച കേസില്‍ യുവാവ് അറസ്റ്റില്‍. ക്ലാസിലിരുന്ന വിദ്യാര്‍ഥിയെ കൈയേറ്റം ചെയ്യാനുള്ള യുവാവിന്റെ ശ്രമം തടയുന്നതിനിടെയാണ് അധ്യാപകന് മര്‍ദനമേറ്റത്. എരവിമംഗലം കക്കാട്ടുപറമ്പില്‍ ആദില്‍ അലി(25)യെയാണ് പെരിന്തല്‍മണ്ണ സി.ഐ. ടി.എസ് ബിനു അറസ്റ്റ് ചെയ്തത്. ആനമങ്ങാട് ഗവ. ഹയര്‍സെക്കന്‍ഡറി സ്‌കൂളില്‍ വ്യാഴാഴ്ചയായിരുന്നു സംഭവം. ക്ലാസിലേക്ക് അതിക്രമിച്ച് കയറിയെത്തിയ യുവാവ് തടയാന്‍ ശ്രമിച്ച അധ്യാപകനെ തള്ളിയിട്ട് കൃത്യനിര്‍വഹണം തടസപ്പെടുത്തുകയായിരുന്നുവെന്ന് പ്രഥമാധ്യാപിക നല്‍കിയ പരാതിയില്‍ പറയുന്നു. പെരിന്തല്‍മണ്ണ കോടതിയില്‍ ഹാജരാക്കിയ യുവാവിനെ റിമാന്‍ഡ് ചെയ്തു.