കാക്കനാട് : തൃക്കാക്കര മില്ലുംപടി വായനശാലയ്ക്ക് സമീപം മണ്ണിടിച്ചിലിനെ തുടര്‍ന്ന് നിര്‍ധന കുടുംബം ദുരിത ഭീതിയില്‍. കൂലിപ്പണിക്കാരനായ മണപ്പിള്ളി ഞാലില്‍ ശശിയുടെ വീട്ടിലേക്ക് ഇയാളുടെ സഹോദരന്റെ സ്ഥലത്തെ മണ്‍തിട്ട ഇടിഞ്ഞു വീഴുകയായിരുന്നു.
ഇദ്ദേഹവും കുടുംബവും സ്ഥലത്തില്ലാതിരുന്നതിനാല്‍ വന്‍ദുരന്തം ഒഴിവായി. വീടിന്റെ പുറകുവശത്തെ ഭിത്തിയും, ബാത് റൂമും വിള്ളല്‍ വീഴുകയും, ഏത് നിമിഷവും നിലം പതിക്കുന്ന അവസ്ഥയിലുമാണ്.
സംഭവം സ്ഥലത്തെത്തിയ വാര്‍ഡ് കൗണ്‍സിലര്‍ റഫീഖ് പൂതേലിയും നാട്ടുകാരും മണ്ണ് നീക്കം ചെയ്ത് താല്‍കാലിക സംവിധാനങ്ങള്‍ ഒരുക്കി. വിഷയം കലക്ടറുടെ ശ്രദ്ധയില്‍പ്പെടുത്തുകയും നഗരസഭയില്‍ പ്രത്യേക ചര്‍ച്ച ചെയ്ത് അനുയോജ്യമായ നടപടികള്‍ കൈക്കൊള്ളുമെന്നും കൗണ്‍സിലര്‍ അറിയിച്ചു.