കോലഞ്ചേരി: നൂറ് കണക്കിന് ബസ് യാത്രക്കാരും വിദ്യാര്‍ഥികളും സഞ്ചരിക്കുന്ന വഴിയില്‍ മാലിന്യം തള്ളുന്നതായി പരാതി. കോലഞ്ചേരി എം.ഒ.എസ്.സി മെഡിക്കല്‍ കോളജ് പെരുമ്പാവൂര്‍ റോഡിന് സമീപമുള്ള വഴിയിലാണ് മാലിന്യം തള്ളുന്നത് പതിവാകുന്നത്. ഇതിലൂടെ വിദ്യാര്‍ഥികളും കോലഞ്ചേരി സ്വകാര്യ ബസ്റ്റാന്റിലേക്ക് ആശുപത്രിയില്‍ നിന്നുള്ളവരുമുള്‍പ്പടെ നൂറ് കണക്കിനാളുകളാണ് ദിവസവും നടന്നു പോകുന്നത്. ബസ്റ്റാന്റിലേക്കുള്ള എളുപ്പവഴിയായതുകൊണ്ട് പലരും ഈ വഴിയാണ് ഉപയോഗിച്ചു വരുന്നത്.
സ്‌കൂളിലേക്ക് വിദ്യാര്‍ഥികളെ ഓട്ടോറിക്ഷയിലും കാറുകളിലും ബൈക്കുകളിലും രക്ഷിതാക്കളടക്കം ഇറക്കി വിടുന്ന സ്ഥലത്ത് തന്നെയാണ് മാലിന്യം നിക്ഷേപിക്കുന്നത്. കൂടാതെ നിരവധി ഡോക്ടര്‍മാരടക്കം താമസിക്കുന്ന ക്വാര്‍ട്ടേഴ്‌സുകളോട് ചേര്‍ന്നാണ് മാലിന്യം തള്ളുന്നത്. പകര്‍ച്ച വ്യാധികള്‍ പടര്‍ന്നു പിടിക്കുമ്പോളാണ് വഴിയോരത്ത് മാലിന്യം തള്ളുന്നത്.
കവറുകളിലാക്കി നിക്ഷേപിക്കുന്ന മാലിന്യം ടൗണിന്റെ വിവിധ ഭാഗങ്ങളില്‍ നിന്നും പൂത്തൃക്ക പഞ്ചായത്തിന്റെ നേതൃത്വത്തില്‍ എല്ലാ ദിവസവും നീക്കം ചെയ്തുവരുമ്പോളാണ് വഴിയോരത്ത് മാലിന്യം വിതറുന്നത്. പ്ലേറ്റുകളും, ആഹാരാവശിഷ്ടങ്ങളും, പ്ലാസ്റ്റിക് കവറുകളുമടക്കം ചിന്നിച്ചിതറി കിടക്കുകയാണ്. കുട്ടികളടക്കം ഇവയില്‍ ചവിട്ടിയാണ് സ്‌കൂളിലേക്ക് പോകുന്നത്. എത്രയും വേഗം മാലിന്യം നീക്കം ചെയ്ത് പകര്‍ച്ചവ്യാധി രോഗങ്ങള്‍ പടരുന്നത് തടയാന്‍ നടപടിയെടുക്കണമെന്നും തുടര്‍ന്ന് മാലിന്യം നിക്ഷേപിക്കുന്നത് തടയണമെന്നും നാട്ടുകാര്‍ ആവശ്യപ്പെട്ടു.