ന്യൂഡല്‍ഹി: എന്‍.ഡി.എ മൂന്നിലൊന്ന് ഭൂരിപക്ഷത്തിലേക്കു കടക്കവെ ഇത് മോദിതരംഗമല്ലെന്ന് അഭിപ്രായപ്പെട്ട് ബി.ജെ.പി നേതാവ് സുബ്രഹ്മണ്യം സ്വാമി. ഇത് മോദി തരംഗമല്ല, ഹിന്ദുത്വ തരംഗമാണ് സ്വാമി അഭിപ്രായപ്പെട്ടു. ജാതിക്കുമേല്‍ ഹിന്ദുത്വ വിശ്വാസം നേടിയ വിജയമാണിത്. ജാതിക്ക് മേല്‍ ഹിന്ദുക്കള്‍ വളര്‍ന്നിരിക്കുന്നു എന്നാണ് തെരഞ്ഞെടുപ്പ് ഫലം സൂചിക്കുന്നത്. പുതിയ തലമുറ വോട്ടര്‍മാര്‍ ജാതി ചിന്തക്ക് സ്ഥാനം നല്‍കിയില്ലെന്നും സുബ്രമണ്യം സ്വാമി പറഞ്ഞു. മോദി സര്‍ക്കാരിന്റെ സാമ്പത്തിക നയങ്ങളിലെ പാളിച്ചകള്‍ക്ക് ജനങ്ങള്‍ മാപ്പ് നല്‍കുകയും, പകരം അദ്ദേഹത്തിന്റെ അഴിമതി വിരുദ്ധ ഭരണത്തിലും ബംഗ്ലാദേശി കുടിയേറ്റക്കാര്‍ക്കെതിരെ സ്വീകരിച്ച കടുത്ത നിലപാടും വിജയത്തിന് മുതല്‍കൂട്ടായെന്നും സ്വാമി പറഞ്ഞു. ഹാഫിങ്ടണ്‍ പോസ്റ്റിനോട് സംസാരിക്കുകയായിരുന്നു അദ്ദേഹം.