ആദ്യചുവടുവയ്പ്പില്‍ തന്നെ ചരിത്രം കുറിച്ച് യു.ഡി.എഫിന്റെ സ്വന്തം പെങ്ങളൂട്ടി. ലോക്‌സഭാ തെരഞ്ഞെടുപ്പിന്റെ ഫലം മുഴുവന്‍ പുറത്തുവരാനിരിക്കെ ഒന്നര ലക്ഷത്തിന്റെ റെക്കോര്‍ഡ് ഭൂരിപക്ഷത്തിലേക്കാണ് ലീഡ് നില കടക്കുന്നത്. അതേസമയം വിജയമുറപ്പിച്ചിരുന്ന എല്‍.ഡി.എഫ് കേന്ദ്രങ്ങളില്‍ വന്‍ നിരാശയും പ്രകടമായി.

മണ്ഡലം രണ്ടുതവണ കൈക്കലാക്കിയ സിറ്റിങ് എംപിയായ പി.കെ ബിജുവിനെ പിന്തള്ളിയാണ് രമ്യാ ഹരിദാസിന്റെ തേരോട്ടം തുടരുന്നത്.

അവസാന ഫലസൂചനകള്‍ പുറത്തുവരുമ്പോള്‍ 1,52,509 വോട്ടുകള്‍ക്കാണ് സിറ്റിങ് എം.പിയായ പികെ ബിജുവിനെ പിന്തള്ളി രമ്യാ ഹരിദാസ് ലീഡില്‍ മുന്നില്‍ തുടരുന്നത്. സംസ്ഥാനത്തെ സംവരണ മണ്ഡലമായ ആലത്തൂരില്‍ ചിത്രം യു.ഡി.എഫിന് അനുകൂലമാവുകയാണ്. ആരോപണങ്ങളെ അതിജയിച്ച് കോണ്‍ഗ്രസിന്റെ യുവ മുഖം രമ്യാ ഹരിദാസ് വിജയിച്ചാല്‍ 10 വര്‍ഷത്തെ എല്‍.ഡിഎഫ് ഭരണത്തിനു മണ്ഡലത്തില്‍ അന്ത്യംകുറിക്കും.

പൊതുവെ സിപിഎം കോട്ടയെന്ന് വിശേഷിപ്പിച്ചിരുന്ന ആലത്തൂരില്‍ വനിതാ സ്ഥാനാര്‍ഥിയെ ഇറക്കി കോട്ട പിടിച്ചെടുക്കാനുള്ള യുഡിഎഫ് തീരുമാനം ശരിയായിരിക്കുന്നു എന്നുവേണം ഇതുവരെ പുറത്തുവന്ന ഫലങ്ങളില്‍നിന്ന് മനസിലാക്കാന്‍.

എല്‍ഡിഎഫ് കണ്‍വീനര്‍ എ. ജയരാജന്‍ രമ്യക്കുനേരെ നടത്തിയ അശ്ലീല പരാമര്‍ശവും ഒരുപരിധിവരെ രമ്യക്കു തുണയായിട്ടുണ്ട്. യു.ഡി.എഫിന്റെ പെങ്ങളൂട്ടി വിജയിച്ചാല്‍ പി.കെ ബിജുവിന്റെ ഹാട്രിക് വിജയമെന്ന സ്വപ്‌നം ഇതോടെ തകര്‍ന്നടിയും. നേരത്തെ സമൂഹമാധ്യമങ്ങളിലടക്കം രമ്യക്കെതിരേ ഉയര്‍ന്നുവന്ന അരോപണങ്ങള്‍ ഏശിയില്ലെന്ന് മാത്രമല്ല, രമ്യയുടെ പാട്ടുതന്നെയാണ് ജനങ്ങളുടെ ഹൃദയത്തേരിലേറിയെന്നതും തെളിയുകയാണ്.