ചെന്നൈ: തമിഴ്‌നാട്ടിലെ വടപളനിയില്‍ ദക്ഷിണ പെരുമാള്‍ തെരുവില്‍ അപ്പാര്‍ട്‌മെന്റിന് തീപിടിച്ച് രണ്ട് കുട്ടികളടക്കം നാലുപേര്‍ മരിച്ചു. ഇന്നലെ പുലര്‍ച്ചെ 4.45നായിരുന്നു തീപിടുത്തമുണ്ടായത്. മീനാക്ഷി (60), സെല്‍വി (38), ശാലിനി (10), സഞ്ജയ് (മൂന്ന്) എന്നിവരാണ് കനത്ത പുകയില്‍ ശ്വാസം മുട്ടി മരിച്ചതെന്ന് പൊലിസ് പറഞ്ഞു. പരുക്കേറ്റ അഞ്ചുപേരെ കില്‍പോക്ക് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. അപ്പാര്‍ട്‌മെന്റിലെ താഴെ നിലയില്‍ ഷോര്‍ട്ട് സര്‍ക്യൂട്ടുണ്ടായതാണ് തീപിടിത്തത്തിന് കാരണമായത്. താഴെ നിലയിലെ പാര്‍ക്കിങ് സ്ഥലത്തുണ്ടായിരുന്ന 14 വാഹനങ്ങള്‍ പൂര്‍ണമായും കത്തിനശിച്ചു.