കട്ടക്ക്: ഫെഡറേഷന്‍ കപ്പ് ഫുട്‌ബോളില്‍ നിലവിലെ ചാംപ്യന്‍മാരായ മോഹന്‍ ബഗാന്‍, ബംഗളൂരു എഫ്.സി ടീമുകള്‍ വിജയത്തുടക്കമിട്ടു. ബംഗളൂരു കടുത്ത പോരാട്ടത്തില്‍ ഷില്ലോങ് ലജോങിനെ കീഴടക്കി. രണ്ടിനെതിരേ മൂന്ന് ഗോളുകള്‍ക്കാണ് ബംഗളൂരു വിജയം കണ്ടത്. മോഹന്‍ ബഗാന്‍ മറുപടിയില്ലാത്ത നാല് ഗോളുകള്‍ക്ക് ഡി.എസ്.കെ ശിവാജിയന്‍സിനെ തകര്‍ത്തു.
ശിവാജിയന്‍സിനെതിരേ ആദ്യ പകുതിയില്‍ ഒരു ഗോളും രണ്ടാം പകുതിയില്‍ മൂന്ന് ഗോളുകളും വലയില്‍ നിറച്ചാണ് മോഹന്‍ ബഗാന്‍ വിജയം സ്വന്തമാക്കിയത്. ബല്‍വന്ത് സിങിന്റെ ഇരട്ട ഗോളുകള്‍ നിലവിലെ ചാംപ്യന്‍മാരുടെ വിജയം എളുപ്പമാക്കി. കളിയുടെ 24, 71 മിനുട്ടുകളിലാണ് ബല്‍വന്ത് വല ചലിപ്പിച്ചത്. ശേഷിച്ച ഗോളുകള്‍ ഡാരിയല്‍ ഡഫി 65ാം മിനുട്ടിലും ജെജെ ലാല്‍പെഖുല അവസാന നിമിഷത്തിലും നേടി.
35ാം മിനുട്ടില്‍ ഉദാന്ത സിങ്, 46ാം മിനുട്ടില്‍ എയ്ഗന്‍സന്‍ ലിങ്‌ദോ എന്നിവര്‍ ഗോള്‍ നേടിയപ്പോള്‍ ഒരു ഗോള്‍ ഷില്ലോങ് നായകന്‍ എയ്ബരോലംഗ് കോങ്ജിയുടെ വക സെല്‍ഫായിരുന്നു. കളിയുടെ അവസാന നിമിഷങ്ങളില്‍ രണ്ട് ഗോള്‍ മടക്കി ഷില്ലോങ് ബംഗളൂരുവിനെ ഞെട്ടിച്ചെങ്കിലും വിജയം തടുക്കാന്‍ അവര്‍ക്ക് സാധിക്കാതെ പോയി.

സ്വന്തം തട്ടകത്തില്‍ മിലാന് തോല്‍വി
മിലാന്‍: ഇറ്റാലിയന്‍ സീരി എ പോരാട്ടത്തില്‍ സ്വന്തം തട്ടകത്തില്‍ എ.സി മിലാന് കനത്ത തോല്‍വി. റോമ അവരെ ഒന്നിനതിരേ നാല് ഗോളുകള്‍ക്ക് പരാജയപ്പെടുത്തി.

നീസിനെ വീഴ്ത്തി മാഴ്‌സ
പാരിസ്: ഫ്രഞ്ച് ലീഗ് വണില്‍ മൂന്നാം സ്ഥാനത്തുള്ള നീസിനെ അഞ്ചാമതുള്ള ഒളിംപിക്ക് മാഴ്‌സെ പരാജയപ്പെടുത്തി. 2-1നാണ് മാഴ്‌സ വിജയിച്ചത്. ഗോമിസിലൂടെ മാഴ്‌സ ലീഡെടുത്തപ്പോള്‍ രണ്ടാം പകുതിയില്‍ മരിയോ ബെലോട്ടെല്ലി നീസിനെ ഒപ്പമെത്തിച്ചു. എന്നാല്‍ പാട്രിക് എവ്‌രയുടെ നിര്‍ണായക ഗോളിലാണ് മാഴ്‌സ വിജയം സ്വന്തമാക്കിയത്.

മലാഗയ്ക്ക് വിജയം
മാഡ്രിഡ്: സ്പാനിഷ് ലാ ലിഗയില്‍ മലാഗയ്ക്ക് വിജയം. മറുപടിയില്ലാത്ത മൂന്ന് ഗോളുകള്‍ക്ക് അവര്‍ സെല്‍റ്റ വിഗോയെ പരാജയപ്പെടുത്തി.