പ്രതീക്ഷ പോലെ മലപ്പുറം വീണ്ടും കീഴടക്കി കുഞ്ഞാലിക്കുട്ടി. മലപ്പുറം ലോക്‌സഭാ മണ്ഡലത്തില്‍ യു.ഡി.എഫ് നേടിയത് റെക്കോര്‍ഡ് ജയം. മുസ്ലിം ലീഗിലെ പി.കെ കുഞ്ഞാലിക്കുട്ടി ചരിത്ര ഭൂരിപക്ഷ വോട്ടിനാണ് സി.പി.എമ്മിലെ വി.പി സാനുവിനെ പരാജയപ്പെടുത്തിയത്. കുഞ്ഞാലിക്കുട്ടി വീണ്ടും മലപ്പുറം കോട്ടയുടെ കാവല്‍ക്കാരനായി. മുസ്ലിം ലീഗിന് വലയി സ്വാധീനമുള്ള മണ്ഡലത്തില്‍ അട്ടിമറി സാധ്യതയൊന്നും ഉയര്‍ന്നിരുന്നില്ല. ആദ്യഫല സൂചനകള്‍ പുറത്തുവന്നതു മുതല്‍ മലപ്പുറം ലോക്‌സഭാ മണ്ഡലത്തില്‍ പി.കെ കുഞ്ഞാലിക്കുട്ടി മുന്നിട്ടു നില്‍ക്കുകയായിരുന്നു. പിന്നീട് ഓരോ ഘട്ടത്തിലും ലീഡ് ഉയര്‍ത്തുകയായിരുന്നു. മലപ്പുറത്തെ മുസ്ലിം ലീഗ് മേധാവിത്വം പ്രകടമാകുന്ന ഫലമാണ് പുറത്തുവന്നത്. സിറ്റിങ് എം.പി എന്ന നിലയിലുള്ള പ്രവര്‍ത്തനവും പാര്‍ട്ടിയുടെ കരുത്തുമാണ് കുഞ്ഞാലിക്കുട്ടിക്ക് തിളക്കമാര്‍ന്ന വിജയം സമ്മാനിച്ചത്.

2014ല്‍ മലപ്പുറം ലോക്‌സഭാ മണ്ഡലത്തില്‍നിന്ന് തെരഞ്ഞെടുക്കപ്പെട്ട ഇ. അഹമ്മദിന്റെ വിയോഗത്തെ തുടര്‍ന്ന് 2017ല്‍ നടന്ന ഉപതെരഞ്ഞെടുപ്പില്‍ 1,71,038 വോട്ടിനാണ് കുഞ്ഞാലിക്കുട്ടി വിജയിച്ചത്. എന്നാല്‍ രണ്ടാം ഊഴത്തില്‍ ഇ. അഹമ്മദ് 2014ല്‍ നേടിയ രണ്ടു ലക്ഷത്തോടടുത്ത ലീഡ് മറികടക്കാന്‍ കുഞ്ഞാലിക്കുട്ടിക്കായി. മണ്ഡലത്തില്‍ വലിയ സ്വാധീനം മുസ്ലിം ലീഗ് പാര്‍ട്ടിക്കുള്ളതിനാല്‍ എതിര്‍ സ്ഥാനാര്‍ഥി എല്‍.ഡി.എഫിലെ വി.പി സാനുവിന് കാര്യമായ ചലനമൊന്നും ഉണ്ടാക്കാനായില്ല. കഴിഞ്ഞ നിയമസഭാ തെരഞ്ഞെടുപ്പില്‍ മണ്ഡലത്തിലെ ഏഴ് നിയമസഭാ മണ്ഡലങ്ങളിലും യു.ഡി.എഫാണ് വിജയിച്ചത്. പ്രവചനങ്ങളിലെല്ലാം പറഞ്ഞതുപോലെ പച്ചക്കോട്ട ഇളകാതെ നിന്നു. ഏഴു തവണ നിയമസഭാംഗവും അഞ്ചുതവണ മന്ത്രിയുമായ കുഞ്ഞാലിക്കുട്ടി എം.പിയായിരിക്കെ പാര്‍ലമെന്റില്‍ എത്താതിരുന്നതിന് വിമര്‍ശനം ഉയര്‍ന്നിരുന്നെങ്കിലും അത് വോട്ടില്‍ പ്രതിഫലിച്ചില്ല.

മുസ്ലിം ലീഗിന്റെ അഖിലേന്ത്യ ജനറല്‍ സെക്രട്ടറിയാണ് പി.കെ കുഞ്ഞാലിക്കുട്ടി. 2011ല്‍ വേങ്ങര നിയോജക മണ്ഡലത്തില്‍നിന്നു തിരഞ്ഞെടുക്കപ്പെട്ടു. 20012005ല്‍ കേരളത്തിന്റെ വ്യവസായ മന്ത്രിയായിരുന്നു. 2017 മാര്‍ച്ച് ഒന്നിന് മുസ്ലിം ലീഗ് അഖിലേന്ത്യാ ജനറല്‍ സെക്രട്ടറി ആയി തിരഞ്ഞെടുക്കപ്പെട്ടു. പാണ്ടിക്കടവത്ത് മുഹമ്മദ് ഹാജിയുടെയും കെ.പി ഫാത്തിമ്മക്കുട്ടിയുടെയും മകനായി 1951 ജനുവരി ആറിനാണ് കുഞ്ഞാലിക്കുട്ടി ജനിച്ചത്. കോഴിക്കോട് ഫാറൂഖ് കോളജിലാണ് ബിരുദ പഠനം പൂര്‍ത്തിയാക്കിയത്. ഇക്കാലത്ത് മുസ്ലിം ലീഗിന്റെ വിദ്യാര്‍ഥി സംഘടനയായ എം.എസ്.എഫിലൂടെയാണ് അദ്ദേഹം രാഷ്ട്രീയത്തിലെത്തുന്നത്.

തളിപ്പറമ്പ് സര്‍ സയ്യിദ് കോളജില്‍ എം.എസ്.എഫിന്റെ യൂനിറ്റ് പ്രസിഡന്റ് പദവിയിലും പ്രവര്‍ത്തിച്ചിട്ടുണ്ട്. പിന്നീട് എം.എസ്.എഫിന്റെ സംസ്ഥാന ഭാരവാഹിയായി. ഇരുപത്തിയേഴാം വയസില്‍ മലപ്പുറം നഗരസഭാ ചെയര്‍മാനായി. 1982ല്‍ നിയമസഭാ അംഗമായി. മലപ്പുറത്ത് നിന്നാണ് വിജയിച്ചത്. പിന്നീട് 1987, 1991, 1996, 2001 വര്‍ഷങ്ങളില്‍ നിയമസഭയിലേക്ക് വിജയിച്ചു. എന്നാല്‍ 2006ല്‍ കുറ്റിപ്പുറത്ത് കെ.ടി ജലീലിനോട് ആദ്യമായി തോല്‍വി ഏറ്റുവാങ്ങി. 2011ലും 2016ലും വിജയിച്ച് വീണ്ടും നിയമസഭയിലെത്തി. 199195 കാലത്തെ കരുണാകരന്‍ മന്ത്രിസഭയിലും 199596 കാലത്തെ എ.കെ ആന്റണി മന്ത്രിസഭയിലും 200104 കാലത്തെ എ.കെ ആന്റണി മന്ത്രിസഭയിലും 200406ലെ ഉമ്മന്‍ചാണ്ടി മന്ത്രിസഭയിലും 201116ലെ ഉമ്മന്‍ ചാണ്ടി മന്ത്രിസഭയിലും കുഞ്ഞാലിക്കുട്ടി അംഗമായിരുന്നു. മന്ത്രിയായിരുന്നപ്പോഴെല്ലാം വ്യവസായ വകുപ്പാണ് അദ്ദേഹം കൈകാര്യം ചെയ്തിരുന്നത്. പാര്‍ലമെന്ററി രംഗത്ത് കഴിവ് തെളിയിച്ചും പാര്‍ട്ടിയിലെ അനിഷേധ്യ സാന്നിധ്യമായും മുന്നേറിയ കുഞ്ഞാലിക്കുട്ടി പാര്‍ട്ടി അഖിലേന്ത്യാ ജനറല്‍ സെക്രട്ടറി പദവിയില്‍ വരെ എത്തി. കെ.എം കുല്‍സുവാണ് കുഞ്ഞാലിക്കുട്ടിയുടെ ഭാര്യ. ലസിത മകളും ആശിഖ് മകനുമാണ്.