പുതുക്കാട് (തൃശൂര്‍): പുതുക്കാട് പൊലിസ് സ്‌റ്റേഷന്‍ പരിധിയില്‍  വാഹനപരിശോധനക്കിടെ 78,80,000 രൂപയുടെ നിരോധിച്ച നോട്ടുകള്‍ പിടികൂടി.  ഇന്നലെ വൈകിട്ട് 6 മണിയോടെ പാഴായിയില്‍ പുതുക്കാട് പൊലിസ് നടത്തിയ വാഹനപരിശോധനക്കിടെയാണ് ഇന്‍ഡിക കാറില്‍ കടത്തുകയായിരുന്ന 500, 1000 രൂപയുടെ നിരോധിത നോട്ടുകള്‍ പിടികൂടിയത്. സംഭവത്തില്‍ 6 പേരെ പൊലിസ് അറസ്റ്റ് ചെയ്തു. ബാബു, ജിതിന്‍, ഷാജി, രാധാകൃഷ്ണന്‍, ജനീഫ്, ഫൈസല്‍ എന്നിവരാണ് അറസ്റ്റിലായത്. തിരുവനന്തപുരം, എറണാകുളം, വാടാനപ്പിള്ളി, പാലക്കാട് സ്വദേശികളാണ് അറസ്റ്റിലായത്.  ഇവരെ ഇന്ന് കോടതിയില്‍ ഹാജരാക്കും. സംഭവത്തെകുറിച്ച് കൂടുതല്‍ അന്വേഷണം നടത്തിവരികയാണെന്ന് പൊലിസ് പറഞ്ഞു.