മാഹി: കേന്ദ്ര ഭരണ പ്രദേശമായ പുതുച്ചേരിയിലെ ഏക ലോക്‌സഭാ സീറ്റ് കോണ്‍ഗ്രസ് തിരിച്ചുപിടിച്ചു. കോണ്‍ഗ്രസിലെ വി. വൈദ്യലിംഗം 1,81,278 വോട്ടിനാണു തിളക്കമാര്‍ന്ന വിജയം സ്വന്തമാക്കിയത്. വൈദ്യലിംഗത്തിനു 3,96,554 വോട്ടും എതിര്‍സ്ഥാനാര്‍ഥിയായി എന്‍.ഡി.എ മുന്നണിയില്‍ മത്സരിച്ച എന്‍.ആര്‍ കോണ്‍ഗ്രസിലെ ഡോ. നാരായണ സ്വാമിക്കു 2,15,276 വോട്ടും ലഭിച്ചു. മാഹിയില്‍ സി.പി.എം പിന്തുണച്ച മക്കള്‍ നീതിമയ്യം സ്ഥാനാര്‍ഥി ഡോ. എം.എ.എസ് സുബ്രഹ്മണ്യത്തിനു 33,050 വോട്ടും ലഭിച്ചു. വിപിപാറ്റ് സ്ലിപ് എണ്ണാന്‍ വൈകുന്നതു കാരണം ഫലപ്രഖ്യാപനവും വൈകി.

മാഹി നിയമസഭാ മണ്ഡലത്തില്‍ വോട്ട് എണ്ണിയപ്പോള്‍ കോണ്‍ഗ്രസിനു വന്‍ലീഡ് ലഭിച്ചു. വൈദ്യലിംഗത്തിനു 12,721 വോട്ട് ലഭിച്ചപ്പോള്‍ നാരായണ സ്വാമിക്കു 4,746 വോട്ട് കിട്ടി. സുബ്രഹ്മണ്യത്തിനു 1,686 വോട്ടും നോട്ടയ്ക്കു 231 വോട്ടും ലഭിച്ചു. കാല്‍നൂറ്റാണ്ടിനു ശേഷം കഴിഞ്ഞ നിയമസഭാ തെരഞ്ഞെടുപ്പില്‍ കോണ്‍ഗ്രസിനു മാഹി സീറ്റ് നഷ്ടപ്പെട്ടിരുന്നു. തിരിച്ചടിയില്‍ നിന്നുള്ള ശക്തമായി തിരിച്ചുവരവാണു മാഹിയില്‍ കോണ്‍ഗ്രസ് നടത്തിയത്.