പാല: പാലാ സീറ്റ് ജോസ് കെ മാണിക്ക് വിട്ടു കൊടുക്കില്ലെന്ന നിലപാടിലുറച്ച് എന്‍.സി.പി. ജയിച്ച ഒരു സീറ്റും വിട്ടുകൊടുത്തുള്ള കോംപ്രമൈസ് വേണ്ടതില്ലെന്നാണ് ദേശീയ നേതൃത്വത്തിന്റെ തീരുമാനമെന്നും അദ്ദേഹം വാര്‍ത്താ സമ്മേളനത്തില്‍ വ്യക്തമാക്കി. പാലാ മാണി സാറിന് ഭാര്യ ആയിരുന്നെങ്കില്‍ എന്റെ ചങ്കാണ്- അദ്ദേഹം പറഞ്ഞു. ജോസ് കെമാണി വരുന്നതു കൊണ്ട് പ്രത്യേകിച്ച് ഗുണമൊന്നും ഉണ്ടാകില്ലെന്നും അദ്ദേഹം പറഞ്ഞു. തന്നെ തെരഞ്ഞെടുത്തത് നഷ്ടമായെന്ന് പാലാക്കാര്‍ക്ക് പറയാനാവില്ലെന്നും അദ്ദേഹം കൂട്ടിച്ചേര്‍ത്തു. പാലാസീറ്റ് വിട്ടുകൊടുത്ത് രാജ്യസഭാ സീറ്റെന്ന അനുനയത്തിനില്ല. രാജ്യസഭാ സീറ്റ് ആര്‍ക്ക് വേണം അദ്ദേഹം ചോദിച്ചു. എന്‍.സി.പി ജയിച്ച ഒരു സീറ്റും വിട്ടുകൊടുക്കില്ലെന്നും അദ്ദേഹം ആവര്‍ത്തിച്ചു.

കേരള കോണ്‍ഗ്രസ് ജോസ് കെ മാണി വിഭാഗം ഇടതുമുന്നണിയിലേക്കെന്ന പ്രഖ്യാപനത്തിന് പിന്നാലെയാണ് മാണി സി കാപ്പന്റെ പ്രതികരണം. സീറ്റുകളില്‍ ധാരണയായില്ലെങ്കിലും പ്രഖ്യാപനം തിങ്കളാഴ്ച ഉണ്ടായേക്കുമെന്നായിരുന്നു റിപ്പോര്‍ട്ട്. ജോസ് കെ മാണിയെ സ്വാഗതം ചെയ്യാനിരിക്കുന്നു ഇടതു മുന്നണിക്കേറ്റ അടിയായിരിക്കുകയാണ് മാണി സി.കാപ്പന്റെ നിലപാട്.

20 സീറ്റുകള്‍ ചോദിച്ച ജോസ് കെ മാണി വിഭാഗത്തിന് 11ലധികം സീറ്റ് നല്‍കാണെന്നാണ് സിപിഎമ്മിന്റെ ഉറപ്പ്. കഴിഞ്ഞ പ്രാവശ്യം മത്സരിച്ച സീറ്റുകള്‍ വേണമെന്ന ഉറച്ച നിലപാടിലാണ് ജോസ് കെ മാണി വിഭാഗം. പാലാ ജോസ് കെ മാണി വിഭാഗത്തിന് നല്‍കാന്‍ മാണി സി കാപ്പനെ അനുനയിപ്പിക്കാനുള്ള നീക്കങ്ങള്‍ തകൃതിയില്‍ നടക്കുന്നതിനിടെയാണ് ഈ തുറന്ന പ്രഖ്യാപനം.