കോട്ടയം: കുമ്മനത്ത് വീട്ടില്‍ കയറി ആക്രമണം നടത്തുകയും വാഹനങ്ങള്‍ തകര്‍ക്കുകയും ചെയത കേസില്‍ എസ്.എഫ്.ഐ നേതാവടക്കം രണ്ടു പേര്‍ പിടിയില്‍. കുമ്മനം ഇളങ്കാവ് ക്ഷേത്രത്തിനു സമീപം കല്ലുമട റോഡില്‍ വി.കെ. സുകുവിന്റെ വീടിനു നേരെ ആക്രമണം നടത്തിയ കേസില്‍ ഒന്നാം പ്രകി റിജേഷ് ബാബുവും നാലാം പ്രതി ജയകുമാറുമാണ് അറസ്റ്റിലായത്.

ഇക്കഴിഞ്ഞ ശനിയാഴ്ച രാത്രി പത്തു മണിയോടെയാണു സംഭവം. വീടിനു മുന്നില്‍ പാര്‍ക്കു ചെയ്തിരുന്ന കാര്‍ മാറ്റുന്നതിനെ ചൊല്ലിയുണ്ടായ തര്‍ക്കത്തെതുടര്‍ന്നാണ് എസ്.എഫ്.ഐ ജില്ലാ സെക്രട്ടറി റിജേഷ് കെ.ബാബുവന്റെ നേതൃത്വത്തില്‍ വീട് ആക്രമിച്ചതെന്ന് വീട്ടുകാര്‍ പൊലിസില്‍ നല്‍കിയ പരാതിയില്‍ പറയുന്നു.

ആക്രമണത്തില്‍ സുകുവിന്റെ കാറും ബൈക്കും തകര്‍ന്നിരുന്നു. സംഭവവുമായി ബന്ധപ്പെട്ട് ഞായറാഴ്ച രാവിലെ തന്നെ മൂന്ന് പേരെ പൊലിസ് പിടികൂടിയിരുന്നു.