തിരുവനന്തപുരം: ലോക്‌സഭാ തെരഞ്ഞെടുപ്പ് ഫലം വന്ന ഇന്നലെ ആദ്യാന്തം ശോകമൂകമായിരുന്നു എ.കെ.ജി സെന്റര്‍.
രാവിലെ തന്നെ ആവേശത്തോടെ എ.കെ.ജി സെന്ററിലെ ടി.വിക്കു മുന്‍പില്‍ അണിനിരന്നവരെ നിരാശരാക്കിയാണ് വോട്ടെണ്ണലിന്റെ ഓരോ നിമിഷവും കടന്നുപോയത്. പോസ്റ്റല്‍ വോട്ടുകളുടെ ഫലം വന്നുതുടങ്ങിയപ്പോള്‍ അല്‍പം പ്രതീക്ഷയര്‍പ്പിച്ചിരുന്നെങ്കിലും തുടര്‍ന്നുള്ള നിമിഷങ്ങള്‍ നിരാശയുടേതായിരുന്നു.

ഒടുവില്‍ കേരളത്തിലെ യു.ഡി.എഫിന്റെ മുന്നേറ്റത്തിന്റെ ഞെട്ടലില്‍ പ്രവര്‍ത്തകരോടൊപ്പം നേതാക്കളും നിരാശരായി. മുഖ്യമന്ത്രി പിണറായി വിജയന്‍ രാവിലെ പത്തോടെ എ.കെ.ജി സെന്ററിലെത്തി പാര്‍ട്ടി സംസ്ഥാന സെക്രട്ടറി കോടിയേരി ബാലകൃഷ്ണന്‍, എല്‍.ഡി.എഫ് കണ്‍വീനര്‍ എ. വിജയരാഘവന്‍ എന്നിവരുമായി സംസാരിച്ചു.

വോട്ടെണ്ണലിന്റെ ട്രെന്‍ഡ് മനസിലാക്കിയ ശേഷം അദ്ദേഹം തിരിച്ചുപോയി.
രാവിലെ 8.30ന് എ. വിജയരാഘവന്‍ ടി.വിക്കു മുന്‍പില്‍ നിലയുറപ്പിച്ചിരുന്നു. നെഗറ്റീവ് ട്രെന്‍ഡ് തുടരുന്നതില്‍ അസ്വസ്ഥനായതിനെ തുടര്‍ന്ന് എ.കെ.ജി സെന്റര്‍ കെട്ടിടത്തിന്റെ മുകളിലേക്കു പോയ അദ്ദേഹം തിരിച്ചുവന്നത് ഒന്‍പതിന്. ആലപ്പുഴയിലും മാവേലിക്കരയിലും എല്‍.ഡി.എഫ് ലീഡ് ചെയ്യുന്നുവെന്ന് കണ്ട് വിജയരാഘവന്‍ വീണ്ടും പ്രതീക്ഷയോടെ ഇരുന്നു.

കണ്ണൂരില്‍ യു.ഡി.എഫ് സ്ഥാനാര്‍ഥി കെ. സുധാകരന്‍ ലീഡ് ചെയ്യുന്നു എന്നും ദേശീയ തലത്തില്‍ എന്‍.ഡി.എ മുന്നേറുന്നു എന്നും വാര്‍ത്ത വന്നതോടെ വിജയരാഘവന്‍ എഴുന്നേറ്റുപോയി. കുറച്ചു കഴിഞ്ഞ് സംസ്ഥാന സമിതി അംഗം സി.എസ് സുജാത എത്തി.
കേരളത്തിലെ 20 സീറ്റുകളിലും യു.ഡി.എഫ് ലീഡുചെയ്യുന്നെന്ന വാര്‍ത്ത കേട്ടതോടെ ടി.വിക്കു മുന്‍പിലിരുന്ന സുജാതയും എഴുന്നേറ്റു.
മന്ത്രിമാരായ ഇ.പി ജയരാജന്‍, കെ.കെ ശൈലജ, കേന്ദ്ര കമ്മിറ്റി അംഗം എം.വി ഗോവിന്ദന്‍ മാസ്റ്റര്‍ എന്നിവര്‍ എത്തിയെങ്കിലും പിണറായി വിജയനെ പോലെ താഴത്തെ നിലയില്‍ നിന്നും ലിഫ്റ്റ് വഴി നേരെ മുകളിലേക്കു പോയ ശേഷം അതുവഴി തന്നെ മടങ്ങുകയായിരുന്നു. ഇ.പി ജയരാജനൊഴികെ ആദ്യം മാധ്യമങ്ങളോട് പ്രതികരിക്കാന്‍ ആരും തയാറായില്ല. പ്രതീക്ഷകള്‍ പൂര്‍ണമായി അസ്തമിച്ചതോടെ ടി.വിക്കു മുന്‍പിലിരുന്ന പ്രവര്‍ത്തകര്‍ ഓരോരുത്തരായി നിരാശയോടെ മടങ്ങി. വൈകിട്ട് മൂന്നോടെയാണ് സംസ്ഥാന സെക്രട്ടറി കോടിയേരി ബാലകൃഷ്ണന്‍ മാധ്യമങ്ങള്‍ക്കു മുന്നിലെത്തിയത്.