കാക്കനാട്: പ്രത്യേക സാമ്പത്തിക മേഖലക്ക് (സെസ്)സമീപം വൃത്തിഹീനമായ സാഹചര്യത്തില്‍ പ്രവര്‍ത്തിച്ചിരുന്ന മുഴുവന്‍ കടകളും ജില്ല ഭരണകൂടം പൊളിച്ച് നീക്കി. കടകള്‍ പൊളിക്കുന്നതില്‍ എതിര്‍പ്പുകള്‍ ഉയരാനുള്ള സാധ്യതകള്‍ കണക്കിലെടുത്ത് രാത്രിയിലായില്‍ വന്‍ പൊലിസ് സന്നാഹത്തോടെയാണ് ജെ.സി.ബി ഉപയോഗിച്ച് കടകള്‍ പൊളിച്ച് നീക്കിയത്. പകര്‍ച്ച വ്യാധികതള്‍ പടര്‍ന്നു പിടിക്കാനുള്ള സാധ്യത യുള്ളതിനെ തുടര്‍ന്നാണ് കലക്ടര്‍ മുഹമ്മദ് വൈ സഫിറുല്ലയുടെ പ്രത്യേക സ്‌ക്വാഡ് പരിശോധ ശക്തമാക്കിയിരിക്കുന്നത്.
വ്യവസായ മേഖലക്ക് സമീപം സീപോര്‍ട് എയര്‍പോര്‍ട് റോഡില്‍ മാലിന്യ കൂമ്പാരത്തിന് നടുവിലാണ് ഹോട്ടലുകളും ശീതളപാനിയ കടകളും പ്രവര്‍ത്തിച്ചിരുന്നത്. സെസിന്റെ പ്രധാന കവാടം മുതല്‍ ജില്ല ജയിലിന്റെ കവാടം വരെയുള്ള മുഴുവന്‍ ഹോട്ടലുകളും പൊളിച്ച് നീക്കി. പകര്‍ച്ച വ്യാധികള്‍ തടയാന്‍ ദുരന്തനിവാരണ വകുപ്പ് പ്രയോഗിക്കാന്‍ കലക്ടര്‍ ഉത്തരവിറക്കിയിരുന്നു. ഇതിന്റെ അടിസ്ഥാനത്തിലാണ് വ്യവസായ മേഖലയിലെ കടകള്‍ പൊളിച്ച് നീക്കിയത്. രാത്രി സമയങ്ങളിലാണ് ഇവിടെ കച്ചവടം തകൃതിയായി നടക്കുന്നത്. വ്യവസായ മേഖലയിലെ കമ്പനികളിലെ തൊഴിലാളികളും ഐ.ടി കമ്പനികളിലെ ജീവനക്കാരുമാണ് പ്രധാനമായും ഭക്ഷണം കഴിക്കാനെത്തുന്നവരില്‍ ഏറെയും. കടകള്‍ പ്രവര്‍ത്തിപ്പിക്കരുതെന്ന് ആരോഗ്യ വകുപ്പ് അധികൃതര്‍ കഴിഞ്ഞ ദിവസം നേരിട്ടെത്തി മുന്നറിയിപ്പ് നല്‍കിയിരുന്നു. ഹോട്ടലുകളില്‍ നിന്ന് ഉള്‍പ്പെടെയുള്ള മാലിന്യത്തിന് നടുവിലാണ് കടകള്‍ പ്രവര്‍ത്തിച്ചിരുന്നത്. പ്ലാസ്റ്റിക്, മാംസം, ഭക്ഷണാവിഷ്ടങ്ങളും നിറഞ്ഞ പരിലരം പൂര്‍ണമായും വ്യത്തിഹീനമാണെന്ന് ആരോഗ്യ വകുപ്പ് അധികൃതര്‍ പറഞ്ഞു.