കൊണ്ടോട്ടി: ദുബൈയില്‍ നിന്നെത്തിയ യാത്രക്കാരന്‍ ശരീരത്തിനുള്ളില്‍ ഒളിപ്പിച്ചു കടത്തിയ 38.86 ലക്ഷത്തിന്റെ സ്വര്‍ണം കരിപ്പൂരില്‍ കസ്റ്റംസ് പ്രിവന്റീവ് വിഭാഗം പിടികൂടി. ഇന്നലെ പുലര്‍ച്ചെ സ്‌പെയ്‌സ് ജെറ്റ് വിമാനത്തില്‍ എത്തിയ കോഴിക്കോട് ഓമശ്ശേരി ഇബ്രാഹീം ശരീഫ് എന്ന യാത്രക്കാരനില്‍ നിന്നാണ് സ്വര്‍ണം കണ്ടെത്തിയത്.
സ്വര്‍ണം ഗുളിക രൂപത്തിലാക്കിയാണ് ഇയാള്‍ ശരീരത്തില്‍ ഒളിപ്പിച്ചിരുന്നത്. നാലു സ്വര്‍ണ ഗുളികകളാണ് ഇയാളില്‍ നിന്ന് കണ്ടെടുത്തത്. ഇവക്ക് 873 ഗ്രാം തൂക്കം വരും. ഡെപ്യൂട്ടി കമ്മിഷണര്‍ ടി.എ കിരണിന്റെ നേതൃത്വത്തില്‍ സൂപ്രണ്ട് കെ.കെ പ്രവീണ്‍കുമാര്‍, പ്രതീഷ്, എം.മുഹമ്മദ് ഫൈസല്‍ തുടങ്ങിയവരാണ് കള്ളക്കടക്ക് പിടികൂടിയത്.