കോഴിക്കോട്: ശൈലി മാറ്റില്ലെന്ന മുഖ്യമന്ത്രിയുടെ നിലപാട് ജനങ്ങളെ കൊഞ്ഞനം കാട്ടുന്നതാണെന്ന് കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്‍. അഹന്തയ്ക്ക് അന്താരാഷ്ട്ര പുരസ്‌കാരമുണ്ടെങ്കില്‍ അത് പിണറായി വിജയന് നല്‍കണം. മാറി നില്‍ക്ക് എന്ന് കേരളത്തിലെ ജനങ്ങളാണ് ഇപ്പോള്‍ പിണറായിയോട് പറയുന്നത്. ഇന്ന് വൈകുന്നേരം തന്നെ ഗവര്‍ണറെ കണ്ട് മുഖ്യമന്ത്രി രാജിക്കത്ത് നല്‍കണമെന്നും മുല്ലപ്പള്ളി ആവശ്യപ്പെട്ടു. മതേതര ജനാധിപത്യത്തിന്റെ അന്തകനാണ് പിണറായി.യാഥാര്‍ഥ്യബോധത്തോടെ മുഖ്യമന്ത്രി തെരഞ്ഞെടുപ്പിനെ വിലയിരുത്തണമെന്നും ശബരിമലയെ യുഡിഎഫ് രാഷട്രീയ ആയുധമാക്കിയില്ല, എന്നാല്‍ ശബരിമലയുടെ ആനുകൂല്യം യുഡിഎഫിന് കിട്ടിയെന്നും മുല്ലപ്പള്ളി പറഞ്ഞു.

പത്തനംതിട്ടയില്‍ ബിജെപി കാണിച്ച രാഷ്ട്രീയം ചര്‍ച്ച ചെയ്യണം. എങ്ങിനെ മൂന്നാം സ്ഥാനത്തായെന്ന് ബിജെപി നേതൃത്വം മറുപടി പറയണമെന്നും മുല്ലപ്പള്ളി പറഞ്ഞു. ഹിന്ദു ധ്രുവീകരണ രാഷ്ട്രീയത്തിന്റെ ഭാഗമായേ കുമ്മനത്തെ കണ്ടിട്ടുള്ളൂവെന്ന നിലപാടില്‍ മാറ്റമില്ല.രാഹുല്‍ ഗാന്ധി രാജി വയ്ക്കുന്ന പ്രശ്‌നമില്ല. കോണ്‍ഗ്രസില്‍ യാതൊരു പ്രതിസന്ധിയുമില്ലെന്നും മുല്ലപ്പള്ളി വ്യക്തമാക്കി.

കേരളത്തിലെ 19 സീറ്റില്‍ ജയിച്ചിട്ടും ആലപ്പുഴയില്‍ മാത്രം തോറ്റ കാര്യം പാര്‍ട്ടി പ്രത്യേകം പരിശോധിക്കുമെന്ന് മുല്ലപ്പള്ളി പറഞ്ഞു. ആലപ്പുഴ തോല്‍വിയെ കുറിച്ച് അന്വേഷിക്കും.പാര്‍ട്ടിയുമായി ബന്ധമുള്ള ആര്‍ക്കെങ്കിലും പങ്കുണ്ടെന്ന് തെളിഞ്ഞാല്‍ പിന്നെ അവര്‍ പാര്‍ട്ടിയിലുണ്ടാകില്ല.ഷാനിമോള്‍ ജയിക്കേണ്ട സ്ഥാനാര്‍ഥിയായിരുന്നെന്നും മുല്ലപ്പള്ളി പറഞ്ഞു.