മോസ്‌കോ: തങ്ങളുടെ രഹസ്യങ്ങള്‍ ചോര്‍ത്തിയെന്ന് ആരോപിച്ച് ഐ.എസ് റഷ്യന്‍ രഹസ്യാന്വേഷണ ഉദ്യോഗസ്ഥന്റെ തലയറുത്തു. ഇതിന്റെ വിഡിയോ ദൃശ്യങ്ങള്‍ പുറത്തുവിട്ടു. ക്യാപ്റ്റന്‍ യെവ്‌നി പെട്രെങ്കോയെന്ന 36കാരനെയാണ് തലയറുത്തത്. ഇദ്ദേഹം കസാക്കിസ്ഥാനിലെയും മറ്റും ഐ.എസ് ക്യാംപുകളില്‍ നുഴഞ്ഞുകയറിയെന്നും രഹസ്യങ്ങള്‍ ചോര്‍ത്തിയെന്നുമാണ് ഐ.എസ് ആരോപിക്കുന്നത്. കഴിഞ്ഞവര്‍ഷം സിറിയയില്‍ വച്ചാണ് ഇദ്ദേഹം ഐ.എസിന്റെ പിടിയിലായത്.
ഭീകരവാദ മാധ്യമങ്ങളെ നിരീക്ഷിക്കുന്ന സൈറ്റ് ഇന്‍ലിജന്‍സ് ഗ്രൂപ്പിനാണ് വീഡിയോ ലഭിച്ചത്. ഇത് ഇന്നലെ ഇവര്‍ സ്ഥിരീകരിച്ചു. പെട്രെങ്കോയുടെ അഭിമുഖ രീതിയിലാണ് വിഡിയോ ചിത്രീകരിച്ചിരിക്കുന്നത്. അതില്‍ അദ്ദേഹം റഷ്യന്‍ സര്‍ക്കാര്‍ തന്നെ ഉപേക്ഷിക്കുകയാണെന്ന് ആരോപിക്കുകയും റഷ്യ സിറിയയിലെ തങ്ങളുടെ സൈനിക നടപടികള്‍ അവസാനിപ്പിക്കണമെന്ന് ആവശ്യപ്പെടുകയും ചെയ്തിരുന്നു. ഉമര്‍ അല്‍ ഷിഷാനിയുടെ സംഘത്തിന്റെ വിവരങ്ങള്‍ ചോര്‍ത്താനാണ് താന്‍ നിയോഗിക്കപ്പെട്ടിരുന്നു. എന്നാല്‍ ഇതിനിടെ താന്‍ അറസ്റ്റിലായി എന്നു ഇയാള്‍ പറയുന്നു.