തിരുവനന്തപുരം: ട്രെയിനില്‍ നിന്ന് ഇറങ്ങുന്നതിനിടെ പുറത്തേക്ക് വീണ യുവതിയുള്‍പ്പെടെ രണ്ടുപേര്‍ക്ക് ഗുരുതരമായി പരുക്കേറ്റു. തമ്പാനൂര്‍, പേട്ട റെയില്‍വേ സ്‌റ്റേഷനുകളില്‍ ആണ് സംഭവം. പുലര്‍ച്ചെ 4.15ന് പേട്ട റെയില്‍വേ സ്റ്റേഷനിലുണ്ടായ അപകടത്തില്‍ യുവതിയായ യാത്രക്കാരിയുടെ വലതുകൈ അറ്റുപോയി. പാലക്കാട് ചെര്‍പ്പുളശേരി സ്വദേശിനി ആമിനക്കാണ് (38) കൈ നഷ്ടപ്പെട്ടത്. പുലര്‍ച്ചെ മംഗളൂരില്‍ നിന്നെത്തിയ എക്‌സ്പ്രസ് ട്രെയിനില്‍ നിന്ന് സ്റ്റേഷനില്‍ ഇറങ്ങുമ്പോഴായിരുന്നു അപകടം.
ഒപ്പമുണ്ടായിരുന്ന മൂന്നുപേര്‍ ഇറങ്ങിയശേഷം അവസാനമായാണ് ആമിന ട്രെയിനില്‍ നിന്നിറങ്ങിയത്. ആമിന ഇറങ്ങുന്നതിനു മുന്‍പ് ട്രെയിന്‍ നീങ്ങിത്തുടങ്ങി. വെപ്രാളത്തില്‍ പുറത്തേക്ക് ചാടിയ യുവതി ട്രെയിനിനും പ്ലാറ്റ്‌ഫോമിനും ഇടയിലുള്ള വിടവിലൂടെ ട്രാക്കിലേക്ക് വീഴുകയായിരുന്നു. ഉടന്‍ യാത്രക്കാര്‍ ചങ്ങല വലിച്ചു. ചക്രങ്ങള്‍ക്കിടയില്‍പ്പെട്ട് വലതുകൈ അറ്റ യുവതിയെ ഒപ്പമുണ്ടായിരുന്നവരും മറ്റു യാത്രക്കാരും പുറത്തെടുത്തശേഷം പൊലിസ് സഹായത്തോടെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
രാവിലെ 6.40ന് തിരുവനന്തപുരം തമ്പാനൂര്‍ സെന്‍ട്രല്‍ റെയില്‍വേ സ്റ്റേഷനിലായിരുന്നു രണ്ടാമത്തെ അപകടം. പാലക്കാട് അമൃത രാജ്യറാണി എക്‌സ്പ്രസിലെ യാത്രക്കാരനായ വയനാട് സുല്‍ത്താന്‍ബത്തേരി സ്വദേശി സദാനന്ദന്‍ (55) ട്രെയിനില്‍ നിന്ന് ഇറങ്ങുന്നതിനിടെ ട്രാക്കിലേക്ക് വീഴുകയായിരുന്നു. ഗുരുതരമായി പരുക്കേറ്റ ഇയാളെ യാത്രക്കാരും പൊലിസും ചേര്‍ന്ന് തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.