പുനെ : കോഴിയുടെ കൂവല്‍ കാരണം ഉറങ്ങാന്‍ സാധിക്കുന്നില്ലെന്ന പരാതിയുമായി യുവതി. മഹാരാഷ്ട്രയിലെ പൂനെയിലാണ് കോഴിയെ കൊണ്ട് പൊറുതിമുട്ടിയ യുവതി പരാതിയുമായി രംഗത്തു വന്നത്. പൂനെയിലെ സമര്‍ഥ് പൊലിസ് സ്റ്റേഷനിലാണ് യുവതി പരാതി നല്‍കിയത്.

എന്നും രാവിലെ തന്റെ വീടിനു മുന്നില്‍ വന്നാണ് കോഴി കൂവുന്നതെന്നും അതുകൊണ്ടു തന്നെ ഉറങ്ങാന്‍ സാധിക്കുന്നില്ലെന്നുമാണ് യുവതി പരാതിപ്പെട്ടത്. കോഴിയോടൊപ്പം കോഴിയുടെ ഉടമയ്‌ക്കെതിരെയും പരാതിയുണ്ട്. എന്നാല്‍ യുവതി താമസിക്കുന്നത് ഇവിടെയല്ലെന്നാണ് പൊലിസ് പറയുന്നത്. തന്റെ സഹോദരിയുടെ വീട്ടില്‍ കുറച്ച് ദിവസം താമസിക്കാന്‍ വന്നതാണ് പരാതിക്കാരി. അവിടെ വച്ചാണ് കോഴിയുടെ കൂവല്‍ പ്രശ്‌നം മൂലം പരാതി നല്‍കിയത്.
പരാതി നല്‍കിയതിനു പിന്നാലെ ഇവര്‍ തിരികെ തന്റെ സ്വന്തം നാട്ടിലേക്കു പോയി. അതേ സമയം, പരാതിക്കാരിക്ക് ചെറിയ തോതില്‍ മാനസിക പ്രശ്‌നങ്ങളുണ്ടെന്ന് സഹോദരി പൊലിസിനെ അറിയിച്ചിട്ടുണ്ട്. പൊലിസ് പരാതി രജിസ്റ്റര്‍ ചെയ്തിട്ടില്ല.