ന്യൂഡല്‍ഹി: ഹത്രാസിലേക്കുള്ള യാത്രക്കിടെ യു.പി പൊലിസ് അറസ്റ്റ് ചെയ്ത് യു.എ.പി.എ ചുമത്തിയ മലയാളി മാധ്യമപ്രവര്‍ത്തകന്‍ സിദ്ദീഖ് കാപ്പന്റെ കാര്യത്തില്‍ വിഷയം പഠിച്ചശേഷം യു.പി സര്‍ക്കാരുമായും കേന്ദ്ര ആഭ്യന്തര മന്ത്രിയുമായും സംസാരിക്കാമെന്ന് കേന്ദ്ര വാര്‍ത്താവിതരണ പ്രക്ഷേപണകാര്യമന്ത്രി പ്രകാശ് ജാവ്‌ദേക്കര്‍. കേന്ദ്ര മന്ത്രിയുമായി കൂടിക്കാഴ്ച നടത്തിയ എളമരം കരിം എം.പി ഇക്കാര്യം മന്ത്രിയുടെ ശ്രദ്ധയില്‍പ്പെടുത്തുകയായിരുന്നു. കേന്ദ്ര സര്‍ക്കാര്‍ പൂട്ടാനോ സ്വകാര്യവത്കരിക്കാനോ തീരുമാനിച്ച കാസര്‍കോട്ടെ ബി.എച്ച്.ഇ.എല്‍-ഇ.എം.എല്‍ പ്ലാന്റ്, ഇന്‍സ്ട്രുമെന്റേഷന്‍ ലിമിറ്റഡിന്റെ പാലക്കാട്ടെ യൂനിറ്റ് എന്നിവ കേരളാ സര്‍ക്കാര്‍ ഏറ്റെടുക്കാമെന്ന കേരളത്തിന്റെ നിലപാടില്‍ കേന്ദ്ര തീരുമാനം നീണ്ടു പോകുന്നതില്‍ എളമരം കരീം പ്രതിഷേധം അറിയിച്ചു.
കാസര്‍കോട്ടെ പ്ലാന്റ് കേരളത്തിന് വിട്ടുനല്‍കാനുള്ള കരട് ധാരണാപാത്രം വരെ തയാറായതാണ്. കേരള സര്‍ക്കാര്‍ ചെയ്യേണ്ട എല്ലാ നടപടികളും പൂര്‍ത്തിയാക്കുകയും സംസ്ഥാന ബജറ്റില്‍ 10 കോടി രൂപ മാറ്റിവെക്കുകയും ചെയ്തു. പക്ഷെ മാസങ്ങളായിട്ടും കേന്ദ്രത്തിന്റെ ഭാഗത്തുനിന്ന് അനുകൂലമായ നടപടികള്‍ ഉണ്ടായില്ലെന്ന് എളമരം കരീം ചൂണ്ടിക്കാട്ടി. ഇന്‍സ്ട്രുമെന്റേഷന്‍ ലിമിറ്റഡിന്റെ പാലക്കാട് യൂണിറ്റ് കേരള സര്‍ക്കാരിന് വിട്ടുകൊടുക്കാനുള്ള വ്യവസ്ഥകള്‍ അംഗീകരിച്ചുകൊണ്ട് കേന്ദ്രവും സംസ്ഥാനവും 2018 നവംബറില്‍ ധാരാണാപാത്രം ഒപ്പുവച്ചിരുന്നു. ധാരണപത്രം ഒപ്പുവയ്ക്കുന്ന സമയത്ത് പ്ലാന്റിന് സ്വന്തമായുള്ള ഭൂമിയുടെ വില കണക്കാക്കിയിരുന്നില്ലെന്നും ആ വില സംസ്ഥാനം നല്‍കിയാല്‍ മാത്രമേ ഇനി തുടര്‍ നടപടികള്‍ എടുക്കാന്‍ കഴിയൂ എന്നുമാണ് കേന്ദ്ര നിലപാട്. കേരളത്തിനോട് കേന്ദ്രം കാണിക്കുന്ന വിവേചനപരമായ നിലപാടുകളിലുള്ള പ്രതിഷേധം മന്ത്രിയെ അറിയിച്ചതായും എളമരം കരീം പറഞ്ഞു.