കോഴിക്കോട്: ഹാള്‍മാര്‍ക്ക് ചെയ്യാന്‍ കൊണ്ടുവരുന്നതിനിടെ ബസില്‍ വച്ച് അരക്കോടി രൂപയുടെ സ്വര്‍ണം കവര്‍ന്ന സംഭവത്തില്‍ അന്വേഷണം മറ്റു ജില്ലകളിലേക്കും വ്യാപിപ്പിക്കുമെന്ന് കസബ പൊലിസ് അറിയിച്ചു. നിലവിലെ സമാനകേസുകളുമായി ബന്ധപ്പട്ടും സ്ഥിരമായി ബസുകളില്‍ മോഷണം നടത്തുന്നവരിലേക്കും അന്വേഷണം വ്യാപിപ്പിച്ചിട്ടുണ്ട്. സ്ഥിരം കുറ്റവാളികളുടെ പട്ടിക തയാറാക്കി വരികയാണ്.
അന്വേഷണത്തിന്റെ ഭാഗമായി ഇതരജില്ലകളിലെ പൊലിസിന്റെ സഹായം തേടും. സമാനകേസിലുള്‍പ്പെട്ട് ശിക്ഷ കഴിഞ്ഞ് പുറത്തിറങ്ങിയവരുടെയും ജാമ്യത്തിലിറങ്ങിയവരുടെയും വിവരങ്ങളും പൊലിസ് ശേഖരിക്കുന്നുണ്ട്. അതേസമയം മൊബൈല്‍ ഫോണ്‍ കേന്ദ്രീകരിച്ചുള്ള അന്വേഷണത്തില്‍ വലിയ പുരോഗതിയില്ലെന്ന് പൊലിസ് പറഞ്ഞു. അന്വേഷണം ഇതരസംസ്ഥാനക്കാരിലേക്കും വ്യാപിപ്പിക്കും. സ്വര്‍ണത്തിന്റെ ഇന്‍ഷുറന്‍സ് തുകയെ കുറിച്ചും പൊലിസ് അന്വേഷിക്കുന്നുണ്ട്. മൂന്നുകിലോ സ്വര്‍ണം പുറത്തേക്ക് കൊണ്ടുപോകുന്നതിന് മാത്രമായി എടുത്തിരിക്കുന്ന ഇന്‍ഷുറന്‍സ് തുക കോടികള്‍ വരും. അതിനാലാണ് പരാതിയുടെ വിവിധ തലങ്ങളെക്കുറിച്ച് പൊലിസ് കാര്യക്ഷമമായി അന്വേഷിക്കുന്നത്.
കഴിഞ്ഞ 18ന് രാവിലെ 8.35ന് രാമനാട്ടുകരയില്‍നിന്ന് കോഴിക്കോട്ടേക്കുള്ള ബസ് യാത്രക്കിടെയാണ് 1.68 കിലോഗ്രാം സ്വര്‍ണം കവര്‍ന്നത്. രാമനാട്ടുകരയിലെ മുബാറക് ജ്വല്ലറി ജീവനക്കാരന്‍ അബ്ദുല്‍ ഗഫൂര്‍ ചിന്താവളപ്പിലെ സ്ഥാപനത്തിലേക്ക് ഹാള്‍മാര്‍ക്ക് ചെയ്യാനായി കൊണ്ടുപോകുന്നതിനിടെ കെ.എസ്.ആര്‍.ടി.സി ബസില്‍ വച്ച് സ്വര്‍ണം നഷ്ടമായതിനെ തുടര്‍ന്ന് കസബ പൊലിസില്‍ പരാതി നല്‍കുകയായിരുന്നു.