കോഴിക്കോട്: എം.വി.ആര്‍ കാന്‍സര്‍ സെന്റര്‍ ആന്‍ഡ് റിസര്‍ച്ച് ഇന്‍സ്റ്റിറ്റ്യൂട്ടിലേക്കുള്ള രോഗികള്‍ക്കും സഹയാത്രികര്‍ക്കുമായി സൗജന്യ ബസ് സര്‍വിസിന് തുടക്കമായി. ദിവസവും രാവിലെ 8.45, ഉച്ചയ്ക്ക് രണ്ട്, വൈകിട്ട് 7.30 എന്നിങ്ങനെ മൂന്നു ട്രിപ്പുകള്‍ കോഴിക്കോട് റെയില്‍വേ സ്റ്റേഷനില്‍നിന്ന് ആശുപത്രി സ്ഥിതിചെയ്യുന്ന ചൂലൂരിലേക്ക് ഉണ്ടാകും.
ബസ് റെയില്‍വേ സ്റ്റേഷന്‍ വളപ്പിലെ ആര്‍.എം.എസ് ഓഫിസ് പരിസരത്ത് നിന്നാണ് പുറപ്പെടുക. കോഴിക്കോട് റെയില്‍വേ സ്റ്റേഷനിലേക്ക് തിരിച്ചും ദിവസവും മൂന്നു ട്രിപ്പുകള്‍ ഉണ്ടാകും. കോഴിക്കോട് സ്റ്റേഷന്‍ പരിസരത്ത് നടന്ന ചടങ്ങില്‍ സ്റ്റേഷന്‍ മാനേജര്‍ ജോസഫ് മാത്യു ബസ് സര്‍വിസ് ഫ്‌ളാഗ്ഓഫ് ചെയ്തു. പി.എസ് സുബില്‍, പി.എ ജയപ്രകാശ്, സാജു ജെയിംസ്, ഡോ. ഷിനൂപ് രാജ്, ടി.വി വേലായുധന്‍, പ്രമോദ് സംബന്ധിച്ചു.