ജിദ്ദ:വിവിധ കേസുകളില്‍അകപ്പെട്ട് ശിക്ഷാ കാലാവധി കഴിഞ്ഞ് മോചനത്തിന് അനുമതി ലഭിച്ചവരും നാടുകടത്തില്‍ (തര്‍ഹീല്‍) കേന്ദ്രങ്ങളില്‍ കഴിയുന്ന റിയാദിലെയും ജിദ്ദയിലെയും
മലയാളികളടക്കമുള്ള 383 ഇന്ത്യക്കാരെ ഇന്ന് സഊദി എയർലൈൻസ് വിമാനത്തിൽ സൗജന്യമായി ഡൽഹിയിലെത്തിക്കും. വൈകുന്നേരം 6.30ന് പുറപ്പെടുന്ന വിമാനത്തിൽ ജിദ്ദയിൽ നിന്ന് 156 ഉം റിയാദിൽ നിന്ന് 227 ഉം പേരുണ്ടാകും.
എംബസിയുടെയും കോൺസുലേറ്റിന്റെയും ഉദ്യോഗസ്ഥരുടെ നേതൃത്വത്തിൽ ഇവരുടെ യാത്രനടപടികളെല്ലാം ഇന്നലെ പൂർത്തിയായി. ജിദ്ദയിൽ നിന്നുള്ളവരുമായി റിയാദിലെത്തുന്ന വിമാനം റിയാദിൽ നിന്നു ഡൽയിലേക്ക് പറക്കും.
മലയാളികളടക്കം വിവിധ സംസ്ഥാനങ്ങളിൽ നിന്നുള്ളവരാണ് ഇന്നു പുറപ്പെടുന്ന വിമാനത്തിലുണ്ടാവുക. ദൽഹിയിലെത്തിയാൽ ഇവർ ഇവരുടെ സംസ്ഥാനങ്ങളിലേക്ക് മടങ്ങും. തർഹീലിൽ സുരക്ഷിതമായി കഴിയുന്നവരായതിനാൽ ഇവർക്ക് കൊവിഡ് ഭീഷണിയുണ്ടാവില്ലെന്നാണ് ഉദ്യോഗസ്ഥർ പറയുന്നത്. അതിനാൽ പ്രത്യേക ക്വാറന്റൈൻ ആവശ്യമില്ല. എന്നാൽ നാട്ടിലെത്തിയാൽ ഹോം ക്വാറന്റൈൻ പൂർത്തിയാക്കേണ്ടിവരും. ഇവർ കൂടി നാടണയുന്നതോടെ നിലവിൽ തർഹീലിലുള്ള ഇന്ത്യക്കാരുടെ എണ്ണത്തിൽ ഗണ്യമായ കുറവുണ്ടാകും.
ദൽഹി, ലഖ്‌നോ, ചെന്നൈ, ഹൈദരാബാദ് എന്നീ വിമാനത്താവളങ്ങളിലേക്കാണ് ഇതുവരെ തർഹീലിൽ നിന്നുള്ളവരുമായി സഊദി എയർലൈൻസ് പറന്നത്.
അതേ സമയം കൊച്ചിയിലേക്ക് ദക്ഷിണേന്ത്യക്കാരുമായി ജിദ്ദയിൽ നിന്നും റിയാദിൽ നിന്നും ഓരോ വിമാനങ്ങൾ സർവീസ് നടത്താൻ അനുമതി ലഭിച്ചിരുന്നുവെങ്കിലും അവസാന നിമിഷം കേരള സർക്കാർ വിലക്കുകയായിരുന്നുവെന്നാണ് വിവരം.
കേരളക്കാർ മാത്രമുള്ള വിമാനമാണെങ്കിൽ അനുമതി നൽകാം എന്ന നിലപാടാണ് നോർക്കയും കേരള സർക്കാറും സ്വീകരിച്ചത്. ക്വാറന്റൈൻ അസാധ്യമാണെന്ന വാദം ഉയർത്തി കേരളം ഈ വിമാനങ്ങൾക്ക് അനുമതി നിഷേധിച്ചത്.