സേലം: ഗുരുതരാവസ്ഥയിലുള്ള വയോധികന്‍ മരിച്ചെന്ന് കുടുംബം. സംസ്‌കാരത്തിനായി മൊബൈല്‍ മോര്‍ച്ചറിയില്‍ നിന്ന് പുറത്തെടുത്തപ്പോള്‍ മരിച്ചയാള്‍ക്ക് ജീവന്‍. മൊബൈല്‍ മോര്‍ച്ചറിയില്‍ നിന്ന് ചൊവ്വാഴ്ചയാണ് 74കാരനായ ബാലസുബ്രഹ്മണ്യ കുമാറിനെ രക്ഷപ്പെടുത്തിയത്. ആശുപത്രിയില്‍ നിന്ന് ഡിസ്ചാര്‍ജ് ചെയ്തശേഷം ഇയാള്‍ മരിച്ചതായാണ് കുടുംബം പറയുന്നത്. തുടര്‍ന്ന് ഒരു രാത്രി ഫ്രീസറില്‍ വയ്ക്കുകയായിരുന്നു. സേലത്താണ് സംഭവം. ഇദ്ദേഹത്തെ പിന്നീട് ആശുപത്രിയിലേക്കു മാറ്റി. ഇയാള്‍ ചികിത്സയിലാണ്.

സ്വകാര്യ കമ്പനിയില്‍ സ്റ്റോര്‍ കീപ്പര്‍ ആയിരുന്ന ബാലസുബ്രഹ്മണ്യം സഹോദരനും ഭിന്നശേഷിക്കാരിയായ അനന്തിരവള്‍ക്കുമൊപ്പമായിരുന്നു താമസിച്ചിരുന്നത്. ആത്മാവ് ശരീരം വിട്ടിട്ടില്ലെന്നും തങ്ങള്‍ അതിനായി കാത്തിരിക്കുകയാണെന്നുമാണ് കുടുംബത്തിന്റെ വിശദീകരണം. സംഭവത്തില്‍ പൊലിസ് കേസെടുത്തു.

മൊബൈല്‍ മോര്‍ച്ചറി തിരികെയെടുക്കാനെത്തിയ ഏജന്‍സി ജീവനക്കാരനാണ് വൃദ്ധന്‍ മരിച്ചിട്ടില്ലെന്നു കണ്ടെത്തിയത്. ഇയാളുടെ സഹോദരനായിരുന്നു മൊബൈല്‍ മോര്‍ച്ചറി വാടകയ്ക്ക് എടുത്തത്. മൊബൈല്‍ മോര്‍ച്ചറിക്കകത്ത് ശ്വാസം എടുക്കാന്‍ കഷ്ടപ്പെടുന്ന വയോധികന്റെ വിഡിയോ സമൂഹമാധ്യമങ്ങളില്‍ പ്രചരിച്ചു.