ബന്തിയോട്: മെഡിക്കല്‍ സ്റ്റോര്‍ കേന്ദ്രീകരിച്ചു മദ്യവില്‍പന നടത്തിയ കേസില്‍ യുവാവ് അറസ്റ്റില്‍. 49 പാക്കറ്റ് കര്‍ണാടക മദ്യവുമായി മെഡിക്കല്‍ ഷോപ്പ് ജീവനക്കാരനായ സൂരംബയലിലെ ഉദയകുമാറാ(40)ണ് എക്‌സൈസ് സംഘത്തിന്റെ പിടിയിലായത്.
ബന്തിയോട്ടെ സ്വകാര്യ മെഡിക്കല്‍ ഷോപ്പ് കേന്ദ്രീകരിച്ച് മദ്യവില്‍പന നടക്കുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തില്‍ എക്‌സൈസ് ഇന്‍സ്‌പെക്ടര്‍ പി.ജെ റോബിന്‍ ബാബുവും സംഘവുമാണ് ഇയാളെ അറസ്റ്റു ചെയ്തത്. വേഷം മാറിയെത്തിയ എക്‌സൈസ് സംഘം മദ്യം ആവശ്യപ്പെട്ടപ്പോള്‍ ജീവനക്കാരന്‍ നല്‍കി. തുടര്‍ന്നു മെഡിക്കല്‍ സ്റ്റോറില്‍ നടത്തിയ പരിശോധനയിലാണ് അകത്തു സൂക്ഷിച്ചിരുന്ന കര്‍ണാടക മദ്യം കണ്ടെത്തിയത്.
അസിസ്റ്റന്റ് ഇന്‍സ്‌പെക്ടര്‍ എന്‍.വി ബാബുരാജ്, സിവില്‍ ഓഫിസര്‍മാരായ വി. സുജിത്ത്, കെ.വി പ്രജിത് കുമാര്‍, മൈക്കിള്‍ ജോസഫ് എന്നിവരും പരിശോധക സംഘത്തിലുണ്ടായിരുന്നു.