സെവിയ്യ: തുടര്‍ച്ചയായ അഞ്ചാം കിരീടം ലക്ഷ്യമിട്ട് കോപ ഡെല്‍റേ ഫൈനലിനിറങ്ങിയ ബാഴ്‌സലോണക്ക് അപ്രതീക്ഷിത തോല്‍വി. ഒന്നിനെതിരേ രണ്ട് ഗോളുകള്‍ക്ക് വലന്‍സിയയാണ് നിലവിലെ ചാംപ്യന്മാരെ തുരത്തിയോടിച്ചത്. 21ാം മിനുട്ടില്‍ കെവിന്‍ ഗമേറോയും 33ാം മിനുട്ടില്‍ റോഡ്രിഗോയും വലന്‍സിയക്ക് വേണ്ടി ഗോള്‍ നേടി. 73ാം മിനുട്ടില്‍ ലയണല്‍ മെസ്സിയിലൂടെ ഗോള്‍നേടി ബാഴ്‌സ തിരിച്ചുവരവ് നടത്തിയെങ്കിലും പ്രതിരോധം ശക്തമാക്കിയ വലന്‍സിയ അനായാസം കിരീടം നേടി.

മത്സരത്തില്‍ വ്യക്തമായ മുന്‍തൂക്കം നേടാനായെങ്കിലും ബാറിന് മുന്നില്‍ ഗോള്‍കീപ്പര്‍ ടെര്‍ സ്റ്റിഗന്റെ അഭാവമാണ് ബാഴ്‌സക്ക് തിരിച്ചടിയായത്. പരുക്ക് മൂലം പുറത്തിരിക്കേണ്ടി വന്ന ജര്‍മന്‍ ഗോള്‍കീപ്പര്‍ ടെര്‍ സ്റ്റിഗന് പകരം ഡച്ച് കീപ്പര്‍ സില്ലിസണ്‍ ബാഴ്‌സലോണക്ക് വേണ്ടി ഇറങ്ങിയെങ്കിലും വലന്‍സിയ മുന്നേറ്റത്തെ ചെറുക്കാന്‍ കഴിഞ്ഞില്ല. മത്സരത്തില്‍ 78 ശതമാനത്തോളം പന്ത് കൈവശംവച്ച് കളിക്കാനായെങ്കിലും ഫിനിഷിങ്ങില്‍ ബാഴ്‌സലോണ പരാജയപ്പെട്ടു. മറുഭാഗത്ത് കിട്ടിയ അവസരങ്ങളെല്ലാം വലന്‍സിയ മുതലെടുത്തു. പ്രതിരോധതാരം ലൂയിസ് ഗയ ഇടതുവിങ്ങിലൂടെ നടത്തിയ നീക്കത്തിനൊടുവിലാണ് ഗോള്‍ പിറന്നത്. പന്തുമായി ഇടതുവിങ്ങിലൂടെ കുതിച്ച ഗയ ബോക്‌സില്‍ നില്‍ക്കുന്ന ഗമേറിയോക്ക് പന്ത് കൈമാറി. പന്ത് ലഭിച ഗമേറിയോ ഗോള്‍കീപ്പര്‍ സില്ലിസനെ ഒന്നു അനങ്ങാന്‍ പോലും സമ്മതിക്കാതെ പന്ത് വലയിലാക്കി. ഗോള്‍ നേടിയിട്ടും ഇടക്കിടെ ബാഴ്‌സ ഗോള്‍മുഖത്തേക്ക് മുന്നേറ്റങ്ങള്‍ നടത്തിയ വലന്‍സിയ 33ാം മിനുട്ടില്‍ വീണ്ടും വല ചലിപ്പിച്ചു. വലതു വിങ്ങില്‍നിന്ന് കാര്‍ലോസ് സോളര്‍ നല്‍കിയ പന്ത് തകര്‍പ്പന്‍ ഹെഡ്ഡറിലൂടെ റോഡ്രിഗോ വലയിലാക്കുകയായിരുന്നു. വലന്‍സിയയുടെ എട്ടാം കോപ ഡെല്‍ റേ കിരീടമാണിത്. 2008ലാണ് വലന്‍സിയ അവസാനമായി കിരീടത്തില്‍ മുത്തമിട്ടത്. 2015, 16, 17, 18 എന്നീ വര്‍ഷങ്ങളില്‍ തുടര്‍ച്ചയായി കോപ ഡെല്‍ റേ ചാംപ്യന്മാരായ ബാഴ്‌സലോണക്ക് ഇതോടെ തുടര്‍ച്ചയായ അഞ്ചാം കിരീടമെന്ന മോഹം വഴിയിലുപേക്ഷിക്കേണ്ടി വന്നു. ചാംപ്യന്‍സ് ലീഗില്‍ ലിവര്‍പൂളിന് മുന്നില്‍ കീഴടങ്ങിയ ബാഴ്‌സലോണ കോപ ഡെല്‍ റേയില്‍ വലന്‍സിയക്ക് മുന്നിലും അട്ടിമറിത്തോല്‍വി ഏറ്റുവാങ്ങി.