കൊണ്ടോട്ടി: നിപ വൈറസ് ബാധയെ തുടര്‍ന്ന് കേരളത്തില്‍ നിന്നുള്ള പഴം-പച്ചക്കറി കാര്‍ഗോ കയറ്റുമതിക്ക് ഏര്‍പ്പെടുത്തിയ വിലക്ക് ഒരു വര്‍ഷത്തിനുശേഷം സഊദി അറേബ്യ പിന്‍വലിച്ചു.
ഇതോടെ കരിപ്പൂര്‍, നെടുമ്പാശ്ശേരി, തിരുവനന്തപുരം വിമാനത്താവളങ്ങളില്‍ നിന്ന് സഊദി അറേബ്യയിലേക്ക് കാര്‍ഗോ കയറ്റുമതി തുടങ്ങി. പെരുന്നാള്‍ മുന്‍നിര്‍ത്തി പഴം, മാങ്ങ തുടങ്ങിയവക്കാണ് ആവശ്യക്കാരേറെയുള്ളത്. കേരളത്തിലെ പഴത്തിനും പച്ചക്കറികള്‍ക്കും സഊദിയില്‍ വലിയ ആവശ്യക്കാരാണുള്ളത്.

കേരളത്തില്‍ നിപ വൈറസ് പടര്‍ന്ന പാശ്ചാത്തലത്തിലാണ് കഴിഞ്ഞ ജൂണ്‍ നാലു മുതല്‍ സഊദി അറേബ്യ കാര്‍ഗോ കയറ്റുമതിക്ക് നിരോധനം ഏര്‍പ്പെടുത്തിയത്. യു.എ.ഇ ഉള്‍പ്പടെ മറ്റു രാജ്യങ്ങളും നിയന്ത്രണം ഏര്‍പ്പെടുത്തിയിരുന്നെങ്കിലും സംസ്ഥാനം നിപ വൈറസ് മുക്തമായി പ്രഖ്യാപിച്ചതോടെ ജൂലൈ, ഓഗസ്റ്റ് മാസങ്ങളില്‍ നിരോധനം പിന്‍വലിച്ചിരുന്നു. എന്നാല്‍ ഒരു വര്‍ഷമായി സഊദി അറേബ്യ നിയന്ത്രണം നീക്കിയിരുന്നില്ല. ഇതിനെ തുടര്‍ന്ന് കോയമ്പത്തൂര്‍, തൃച്ചി അടക്കമുളള വിമാനത്താവളങ്ങളില്‍ നിന്നാണ് കാര്‍ഗോ അയച്ചിരുന്നത്.
ഒരു കിലോക്ക് 19 രൂപ അധികം നല്‍കിയാണ് കേരളത്തിന്റെ പുറത്തുള്ള വിമാനത്താവളങ്ങളിലേക്ക് കാര്‍ഗോ അയച്ചിരുന്നത്. നിയന്ത്രണത്തിന്റെ പേരില്‍ കയറ്റുമതി നിര്‍ത്തിയാല്‍ ഏജന്‍സി നഷ്ടപ്പെടുമെന്നതിനാല്‍ നഷ്ടം സഹിച്ചും കാര്‍ഗോ കയറ്റുമതി നിലനിര്‍ത്തി പോരുകയായിരുന്നുവെന്ന് ഏജന്റുമാര്‍ പറയുന്നു.

സൗദിയിലേക്കുള്ള കാര്‍ഗോ നിയന്ത്രണം പിന്‍വലിക്കണമെന്ന് കയറ്റുമതി ഏജന്റുമാര്‍ നിരവധി തവണ എം.പിമാര്‍ മുഖേന ആവശ്യപ്പെട്ടെങ്കിലും നടപ്പിലായിരുന്നില്ല. സംസ്ഥാനത്തുനിന്ന് 150-മുതല്‍ 200 ടണ്‍ വരെയാണ് ദിനേന കാര്‍ഗോ കയറ്റുമതി.