പൂനെ: ഒരു പൂവന്‍കോഴി കാരണം തന്റെ ഉറക്കം തടസപ്പെടുന്നുവെന്ന പരാതിയുമായി യുവതി പൊലിസ് സ്റ്റേഷനില്‍. മഹാരാഷ്ട്രയിലെ പൂനെയിലാണ് വിചിത്രമായ പരാതി പൊലിസിന് മുന്‍പില്‍ എത്തുന്നത്.
തന്റെ ഉറക്കം തടസപ്പെടുത്തുന്ന തരത്തില്‍ കൂവുന്ന പൂവന്‍കോഴിക്കെതിരേ ആവശ്യമായ നടപടി സ്വീകരിക്കണമെന്നും യുവതി നല്‍കിയ പരാതിയില്‍ പറയുന്നു.

കഴിഞ്ഞ വെള്ളിയാഴ്ചയാണ് സമര്‍ത്ത് പൊലിസ് സ്റ്റേഷനില്‍ സോംവാര്‍ പേട്ട് ഏരിയയിലെ തദ്ദേശവാസിയായ യുവതി പൂവന്‍ കോഴിക്കെതിരേ പരാതി നല്‍കിയത്.

പതിവായി പുലര്‍ച്ചെ തന്റെ വീടിന് മുന്‍പില്‍ എത്തുന്ന പൂവന്‍കോഴി കൂവുകയാണ്. ഇതുകാരണം തനിക്ക് ഉറങ്ങാന്‍ കഴിയുന്നില്ല-യുവതി നല്‍കിയ പരാതിയില്‍ പറയുന്നു.
യുവതിയുടെ പരാതി സ്വീകരിച്ചിട്ടുണ്ടെന്നും ഇത് പരിശോധിച്ച് വരികയാണെന്നും പൊലിസ് പറഞ്ഞു. അതേസമയം, യുവതി പറയുന്ന വീട്ടില്‍ അവര്‍ ഉണ്ടാകാറില്ലെന്നും ആ വീട് അവരുടെ സഹോദരിയുടെതാണെന്നും തിരിച്ചറിഞ്ഞതായി പൊലിസ് പറഞ്ഞു.
ഏതാനും ദിവസങ്ങള്‍ക്ക് മുന്‍പ് താമസിക്കാനായി അവര്‍ സഹോദരിയുടെ വീട്ടിലെത്തിയിരുന്നു. അവിടെ നിന്ന് മടങ്ങും വഴിയാണ് പരാതി നല്‍കിയതെന്നും പൊലിസ് പറഞ്ഞു.
യുവതിക്ക് മാനസികാസ്വാസ്ഥ്യമുണ്ടെന്ന് സഹോദരി പറഞ്ഞതായി പൊലിസ് അറിയിച്ചു. ഏതായാലും ലഭിച്ച പരാതി പരിഗണിച്ച പൊലിസ് ഇതുസംബന്ധിച്ച് അന്വേഷണം തുടങ്ങിയിട്ടുണ്ട്.