തിരുവനന്തപുരം: നിയമസഭയിലെ കെ.എം മാണിയുടെ ഇരിപ്പിടത്തില്‍ പി.ജെ ജോസഫ് ഇരുന്ന നടപടിയില്‍ രൂക്ഷ വിമര്‍ശനവുമായി ജോസ് കെ മാണി രംഗത്ത്. പാര്‍ട്ടിയില്‍ അലോചിക്കാതെയാണ് സീറ്റിനായി മോന്‍സ് ജോസഫ് എം.എല്‍.എ കത്ത് നല്‍കിയതെന്ന് അദ്ദേഹം കുറ്റപ്പെടുത്തി. ആദ്യം പാര്‍ട്ടി ചെയര്‍മാനെ തെരഞ്ഞെടുക്കണം. പിന്നീടാണ് പാര്‍ലമെന്ററി പാര്‍ട്ടി നേതാവിനെ തെരഞ്ഞെടുക്കേണ്ടതെന്നും അദ്ദേഹം ചൂണ്ടിക്കാട്ടി.

പി.ജെ ജോസഫിന് നിയമസഭാ കക്ഷി നേതാവിന്റെ സീറ്റ് അനുവദിക്കണമെന്നാവശ്യപ്പെട്ട് കഴിഞ്ഞ ദിവസമാണ് മോന്‍സ് ജോസഫ് കത്ത് നല്‍കിയത്. ഇതിന്റെ അടിസ്ഥാനത്തില്‍ സ്പീക്കര്‍ പി. ശ്രീരാമകൃഷ്ണന്‍ സീറ്റ് അനുവദിച്ചിരുന്നു. എന്നാല്‍, തൊട്ടുപിന്നാലെ ജോസഫിന് സീറ്റ് അനുവദിക്കരുതെന്നാവശ്യപ്പെട്ട് റോഷി അഗസ്റ്റിന്‍ എം.എല്‍.എയും സ്പീക്കര്‍ക്ക് കത്തുനല്‍കി. കേരളാ കോണ്‍ഗ്രസ് എമ്മില്‍ ചെയര്‍മാന്‍ സ്ഥാനത്തിനായുള്ള തര്‍ക്കം തുടരുന്നതിനിടെയാണ് പുതിയ വിവാദം.