ന്യൂഡല്‍ഹി: പതിനേഴാം ലോക്‌സഭയിലേക്ക് തെരഞ്ഞെടുക്കപ്പെട്ടവരില്‍ 30 ശതമാനം പേര്‍ കുടുംബരാഷ്ട്രീയത്തിന്റെ ഭാഗമായി എം.പി സ്ഥാനം ലഭിച്ചവരെന്ന് കണക്ക്. 542 അംഗ സഭയില്‍ 162 പേരാണ് പാര്‍ട്ടികളില്‍ സ്വന്തം കുടുംബത്തിന്റെ സ്വാധീനം കാരണം മത്സരിക്കാന്‍ സീറ്റ് ലഭിക്കുകയും ജയിക്കുകയും ചെയ്തിരിക്കുന്നത്. കോണ്‍ഗ്രസും ബി.ജെ.പിയും ഇക്കാര്യത്തില്‍ ഒരുപോലെയാണ്. പഞ്ചാബില്‍നിന്നാണ് കുടുംബ സ്വാധീനത്തിന്റെ ഭാഗമായി ഏറ്റവും കൂടുതല്‍ പേര്‍ പാര്‍ലമെന്റിലെത്തുന്നത്. ഇവിടെ 62 ശതമാനം സ്ഥാനാര്‍ഥികളും പാര്‍ട്ടികളിലെ കുടുംബ സ്വാധീനത്തിന്റെ സഹായത്തോടെ സ്ഥാനാര്‍ഥിത്വം നേടിയെടുത്തവരാണ്.
പഞ്ചാബില്‍നിന്ന് മൊത്തം തെരഞ്ഞെടുക്കപ്പെട്ട 13 എം.പിമാരില്‍ എട്ട് പേരുടേയും അടുത്ത ബന്ധുക്കള്‍ പാര്‍ട്ടിയിലെ അറിയപ്പെടുന്ന വ്യക്തികളാണ്. ബിഹാറിനാണ് ഇക്കാര്യത്തില്‍ രണ്ടാം സ്ഥാനം. ആകെ എം.പിമാരില്‍ 43 ശതമാനം പേരാണ് കുടുംബവാഴ്ചയുടെ ഭാഗമായെത്തിയത്.
മൂന്നാം സ്ഥാനത്തുള്ള മഹാരാഷ്ട്രയില്‍ 48 എം.പിമാരില്‍ 20 പേര്‍ക്കും കുടുംബ സ്വാധീനത്തിന്റെ ഭാഗമായിട്ടാണ് സീറ്റ് ലഭിച്ചത്. ദേശീയ തലത്തില്‍ മൊത്തം സ്ഥാനാര്‍ഥികളില്‍ ഏകദേശം 27 ശതമാനത്തോളം ബി.ജെ.പിയും അത്ര തന്നെ കോണ്‍ഗ്രസും കുടുംബരാഷ്ട്രീയക്കാര്‍ക്ക് സ്ഥാനാര്‍ഥിത്വം നല്‍കി. പ്രദേശിക പാര്‍ട്ടികളില്‍ ഇത് 18 ശതമാനത്തോളം വരും. സി.പി.എമ്മും സി.പി.ഐയുമാണ് ഈ പട്ടികയില്‍ ഏറ്റവും പിന്നില്‍.