തിരുവനന്തപുരം: കേരളത്തില്‍ ഇടതുപക്ഷ സര്‍ക്കാര്‍ അധികാരത്തിലെത്തിയിട്ട് നിയമിച്ച കരാര്‍ നിയമനത്തിന് രണ്ടുത്തരം. ആദ്യ ഉത്തരം ലഭിച്ചത് പ്രതിപക്ഷ നേതാവ് കത്തെഴുതിചോദിച്ചപ്പോള്‍. വ്യക്തമാക്കിയത് മുഖ്യമന്ത്രി പിണറായി വിജയനും. എന്നാല്‍ രണ്ടാമത്തെ ഉത്തരമാകട്ടെ വിവരാവകാശ നിയമ പ്രകാരം ലഭിച്ചതും. രണ്ടും തമ്മില്‍ വലിയ അന്തരമാണുള്ളത്. മുഖ്യമന്ത്രിയുടെ ഉത്തരത്തിലുള്ളത് 11674 മാത്രമാണ്.
എന്നാല്‍ വിവരാവകാശ നിയമപ്രകാരം ചോദിച്ചപ്പോള്‍ അതു ലക്ഷങ്ങളായി. അഡ്വ.പ്രാണ്‍കുമാര്‍ വിവരാവകാശ നിയമപ്രകാരം ചോദിച്ചപ്പോള്‍ കിട്ടിയത് 117267(ഒരു ലക്ഷത്തി പതിനേഴായിരത്തി ഇരുന്നൂറ്റി അറുപത്തേഴ്) എന്നാണ്.
ഇപ്പോഴീക്കാര്യം പുറത്തുകൊണ്ടുവന്നത് കോണ്‍ഗ്രസ് നേതാവ് വി.ഡി സതീശനാണ്. ഇതിലേതാണ് ശരിയെന്ന സംശയമുയരുമ്പോള്‍ സതീശന്‍ തന്നെ രണ്ടാമത് ലഭിച്ച ഉത്തരമാണ് ശരിവെക്കുന്നത്. അപ്പോള്‍ എന്തിനാണ് ഇതുപോലൊരു കള്ളം പറഞ്ഞതെന്ന ചോദ്യത്തിനാണ് മുഖ്യമന്ത്രി ഉത്തരം നല്‍കേണ്ടത്. അല്ലെങ്കില്‍ ആര്‍ക്കാണ് തെറ്റുപറ്റിയതെന്ന ചോദ്യത്തിനും ഉത്തരം നല്‍കണം. രണ്ടാമത്തെ ഉത്തരത്തില്‍ ഒരുലക്ഷത്തി അയ്യായിരത്തി അഞ്ഞൂറ്റിതൊണ്ണൂറ്റിമൂന്നാണ് അധികമുള്ളത്.

സതീശന്റെ ഫേസ് ബുക്ക് കുറിപ്പ്

സംസ്ഥാനത്ത് കഴിഞ്ഞ നാലരവര്‍ഷക്കാലം നിയമിച്ച താത്ക്കാലിക/കരാറടിസ്ഥാന /ദിവസ വേതന ജീവനക്കാരുടെ എണ്ണം എത്ര ? പ്രതിപക്ഷ നേതാവ് മുഖ്യമന്ത്രിയോട് കത്തെഴുതി ചോദിച്ചപ്പോള്‍ കിട്ടിയത് 11674പേര്‍ എന്നാണ്.
അഡ്വ.പ്രാണ്‍കുമാര്‍ വിവരാവകാശ നിയമപ്രകാരം ചോദിച്ചപ്പോള്‍ കിട്ടിയത് 117267(ഒരു ലക്ഷത്തി പതിനേഴായിരത്തി ഇരുന്നൂറ്റി അറുപത്തേഴ്) എന്നാണ്.
രണ്ടാമത്തെ ഉത്തരമാണ് ശരി. ഇത് സര്‍ക്കാര്‍ വകുപ്പുകളിലെ മാത്രം കണക്കാണ്. ഇനി അര്‍ധ സര്‍ക്കാര്‍/പൊതുമേഖലാ സ്ഥാപനങ്ങളിലെ കണക്ക് വേറെ വരും.
ഇത്രമാത്രം പിന്‍വാതില്‍ നിയമനങ്ങള്‍ നടന്ന ഒരു കാലവും ഉണ്ടായിട്ടില്ല.
പിന്നെ എങ്ങനെയാണ് പി.എസ്.സി പരീക്ഷ എഴുതി കാത്ത് നില്‍ക്കുന്നവര്‍ക്ക് നിയമനം ലഭിക്കുന്നത്.