കാസര്‍കോട്: റാണിപുരം ഇക്കോ ടൂറിസ്റ്റ് കേന്ദ്രം അനധികൃത കൈയേറ്റവും കുന്നിടിക്കലും മൂലം മറ്റൊരു മൂന്നാറാവുകയാണെന്ന് റാണിപുരം പ്രകൃതി സംരക്ഷണ സമിതി നേതാക്കള്‍ വാര്‍ത്താസമ്മേളനത്തില്‍ ആരോപിച്ചു. ടൂറിസത്തിന്റ മറവില്‍ നടക്കുന്ന ഇത്തരം പ്രവൃത്തികള്‍ക്കെതിരേയും നോക്കുകുത്തികളായി മാറിയ സര്‍ക്കാര്‍ വകുപ്പുകള്‍ക്കെതിരേയും നിയമ നടപടികള്‍ സ്വീകരിക്കുമെന്നു നേതാക്കള്‍ വ്യക്തമാക്കി.
റാണിപുരത്ത് വനത്തോടു ചേര്‍ന്നു കിടക്കുന്ന സ്ഥലമാണ് ഇപ്പോള്‍ കുന്നിടിച്ചു സ്വകാര്യ വ്യക്തി പാര്‍ക്കിങ് സ്ഥലമാക്കി മാറ്റിയിരിക്കുന്നത്. പനത്തടി പഞ്ചായത്തിന്റെ അനുമതിയില്ലാതെയാണ് ഇവിടെ അനധികൃത നിര്‍മാണം നടക്കുന്നത്. ഇത്തരം അനധികൃത നിര്‍മാണങ്ങള്‍ക്കെതിരേ നടപടിയെടുക്കേണ്ട ജിയോളജി, റവന്യൂ, വനം വകുപ്പ് എന്നീ വകുപ്പുകള്‍ ഇതുവരെ ഒരു നടപടിയും സ്വീകരിക്കാത്തത് ദുരൂഹമാണെന്നും റാണിപുരം പ്രകൃതി സംരക്ഷണ സമിതി നേതാക്കള്‍ പറഞ്ഞു.
ഇതിനെതിരേ വിജിലന്‍സിന് പരാതി നല്‍കുമെന്നും കലക്ടര്‍ക്ക് നേരിട്ടു നിവേദനം നല്‍കുമെന്നും നേതാക്കള്‍ പറഞ്ഞു. വാര്‍ത്താ സമ്മേളനത്തില്‍ വി.സി ദേവസ്യ, കെ.കെ അശോകന്‍, സുകുമാരന്‍ പെരിയച്ചൂര്‍, ബാബു കദളിമറ്റം, ലാലു കൊട്ടോടി സംബന്ധിച്ചു.