റിയാദ്: ഫൈനൽ എക്സിറ്റ് വിസ നേടിയ വിദേശികളുടെ വിസ കാലാവധി ഈ മാസം 31 വരെ നീട്ടി. നേരത്തെ ഫൈനല്‍ എക്‌സിറ്റടിച്ച് സഊദി അറേബ്യയിൽ നിന്നും യാത്ര തിരിക്കാൻ സാധിക്കാത്ത എല്ലാവരുടെയും എക്‌സിറ്റ് വിസ 31 വരെ നീട്ടിനല്‍കാൻ സഊദി ഭരണാധികാരി സൽമാൻ ബിൻ അബ്ദുൽ അസീസ് രാജാവാണ് നിർദേശം നൽകിയത്.

    നിലവിലെ കൊവിഡ് സാഹചര്യത്തിൽ വിമാന സർവ്വീസ് പൂർണ്ണമായും പുനഃരാരംഭിക്കാത്ത സാഹചര്യത്തിലാണ് പ്രത്യേക ഉത്തരവ്. എക്‌സിറ്റ് വിസ കാലാവധി അവസാനിച്ച് നാട്ടിലേക്കുള്ള യാത്ര അനിശ്ചിതത്വത്തിലായവര്‍ക്ക് ആശ്വാസമാണ് പുതിയ ഉത്തരവ്. യാതൊരു ഫീസ് ഈടാക്കാതെയാണ് കാലാവധി തീരുന്ന ഫൈനൽ എക്സിറ്റ് വിസ ഒക്ടോബർ 31 വരെ നീട്ടുക.