പാനൂര്‍: നരിക്കോട്ട് മല, പൊയിലൂര്‍, പൊടിക്കളം ഭാഗത്തെ ക്വാറികളില്‍ റവന്യൂ സംഘത്തിന്റെ മിന്നല്‍ പരിശോധന. നാല് ജെ.സി.ബികളും ആറ് കംപ്രസറുകളും പടികൂടി. തലശ്ശേരി തഹസില്‍ദാര്‍ ഹരിദാസന്‍ ബാലേരിയുടെ നേതൃത്വത്തില്‍ പുലര്‍ച്ചെ മുതല്‍ നടന്ന മിന്നല്‍ പരിശോധനയിലാണ് ക്വാറികളില്‍ നിന്നു ഇത്രയും ഖനന സാമഗ്രികള്‍ കണ്ടെത്തിയത്.
നാലു കിലോമീറ്ററോളം നടന്നാണ് റവന്യൂ സംഘം കുന്നിന്‍മുകളിലെ ക്വാറിയിലെത്തിയത്. സ്വകാര്യ വാഹനങ്ങളിലെത്തിയ സംഘത്തെ  തിരിച്ചറിഞ്ഞവര്‍ ക്വാറിയിലെ തൊഴിലാളികള്‍ക്ക് വിവരം കൈമാറുകയായിരുന്നു. ഇതേ തുടര്‍ന്ന് വാഹനങ്ങളും നിര്‍മാണ സാമഗ്രികളും ഉപേക്ഷിച്ച് തൊഴിലാളികള്‍ രക്ഷപ്പെട്ടു. ജെ.സി.ബിയുടെ താക്കോലും മറ്റും ലഭിക്കാത്തതിനാല്‍ വാഹനങ്ങള്‍ കസ്റ്റഡിയിലെടുക്കാന്‍ കഴിഞ്ഞില്ല. ഇതുസംബന്ധിച്ച റിപ്പോര്‍ട്ട് കലക്ടര്‍ക്ക് കൈമാറുമെന്നും തൃപ്പങ്ങോട്ടൂര്‍, പൊയിലൂര്‍ മേഖലകളില്‍ വ്യാപകമായി അനധികൃത ക്വാറികള്‍ പ്രവര്‍ത്തിക്കുന്നുണ്ടെന്ന വിവരത്തിന്റെ അടിസ്ഥാനത്തിലാണ് റെയ്ഡ് നടത്തിയതെന്നും തഹസില്‍ദാര്‍ പറഞ്ഞു. റെയ്ഡ് വരുംദിവസങ്ങളിലും ശക്തിപ്പെടുത്താനാണ് അധികൃതരുടെ തീരുമാനം.