റായ്പൂര്‍: ആര്‍.എസ്.എസ്-ബി.ജെ.പി നേതൃത്വം തങ്ങളുടെ മാര്‍ഗദര്‍ശിയായി കാണുന്ന വീര്‍ സവര്‍ക്കറെ (വിനായക് ദാമോദര്‍ സവര്‍ക്കര്‍) ചൊല്ലി കോണ്‍ഗ്രസ്-ബി.ജെ.പി വാഗ്വാദം.
രാജ്യത്തെ വിഭജിക്കുകയെന്ന പദ്ധതിക്ക് ആദ്യം രൂപം നല്‍കിയത് വീര്‍ സവര്‍ക്കര്‍ ആയിരുന്നുവെന്ന് ഛത്തിസ്ഗഡ് മുഖ്യമന്ത്രിയും കോണ്‍ഗ്രസ് നേതാവുമായ ഭൂപേഷ് ഭാഗല്‍ പറഞ്ഞു. സവര്‍ക്കര്‍ മുന്നോട്ടുവച്ച പദ്ധതി നടപ്പാക്കുന്നതിന് മാത്രമാണ് മുഹമ്മദലി ജിന്ന പ്രവര്‍ത്തിച്ചതെന്നും അദ്ദേഹം ആരോപിച്ചു.
എന്നാല്‍ സവര്‍ക്കറെക്കുറിച്ചുള്ള ചരിത്ര സത്യങ്ങള്‍ വളച്ചൊടിക്കുകയാണ് ആരോപണത്തിലൂടെ മുഖ്യമന്ത്രി ചെയ്തതെന്ന് ബി.ജെ.പി നേതാവും ഛത്തിസ്ഗഡ് മുന്‍ മുഖ്യമന്ത്രിയുമായ രമണ്‍ സിങ് പറഞ്ഞു.
മതാടിസ്ഥാനത്തില്‍ രാജ്യത്തെ വിഭജിക്കുകയെന്ന ആശയം ആദ്യമായി നടപ്പാക്കിയത് സവര്‍ക്കറായിരുന്നു. ഇത് നടപ്പാക്കിയത് ജിന്നയാണ്. ഇത് ചരിത്ര സത്യമാണ്. ഒരാള്‍ക്കുപോലും ഇത് നിഷേധിക്കാനാകില്ലെന്നും മുഖ്യമന്ത്രി ഭൂപേഷ് ഭാഗല്‍ പറഞ്ഞു.
ജനങ്ങളെ തെറ്റിദ്ധരിപ്പിക്കുന്നതിനു വേണ്ടിയുള്ള ആസൂത്രിതമായ നീക്കമാണ് മുഖ്യമന്ത്രി നടത്തുന്നതെന്ന് രമണ്‍ സിങ് ആരോപിച്ചു. ഇന്ത്യന്‍ സ്വാതന്ത്ര്യ സമരത്തില്‍ വലിയ സംഭാവനകള്‍ നല്‍കിയ വ്യക്തിയായിരുന്നു സവര്‍ക്കറെന്നും അദ്ദേഹം കൂട്ടിച്ചേര്‍ത്തു.