ഹൈദരാബാദ്: ഹോളിവുഡ് സിനിമയെ വെല്ലുന്ന രീതിയിലാണ് ഹൈദരാബാദ് നൈസാം മ്യൂസിയത്തില്‍ നിന്ന് മോഷ്ടാക്കള്‍ സ്വര്‍ണ പാത്രങ്ങള്‍ കടത്തിയത്. എന്നാല്‍ മോഷ്ടാക്കളെ കുടുക്കിയ പൊലിസിന്റെ നടപടി ഇതിനേക്കാള്‍ നാടകീയവുമായിരുന്നു. മോഷ്ടാക്കളാകട്ടെ മുംബൈയിലെ ഒരു ഹോട്ടലില്‍ ആഡംബര ജീവിതത്തിലായിരുന്നു.
വജ്രം പതിപ്പിച്ച നാല് കിലോ തൂക്കം വരുന്ന സ്വര്‍ണ ചോറ്റുപാത്രം, സ്വര്‍ണ സ്പൂണുകള്‍, പത്മരാഗകല്ലുകളും മരതക കല്ലുകളും പിടിപ്പിച്ച സ്വര്‍ണ കപ്പ്, സോസര്‍ എന്നിവയാണ് ഒരാഴ്ച മുന്‍പ് ഹൈദരാബാദിലെ മ്യൂസിയത്തില്‍ നിന്ന് മോഷണം പോയത്.
ഇവ മോഷ്ടിച്ച് മുംബൈയില്‍ പൊങ്ങിയ മോഷ്ടാക്കള്‍ ഒരു ഹോട്ടലില്‍ ആഡംബര ജീവിതമാണ് നയിച്ചിരുന്നത്. മോഷ്ടാക്കളില്‍ ഒരാളാകട്ടെ ദിവസവും ഭക്ഷണം കഴിച്ചത് സ്വര്‍ണപാത്രത്തിലായിരുന്നുവെന്നും പൊലിസ് അറിയിച്ചു.