ന്യൂഡല്‍ഹി: ലോക്‌സഭാ തെരഞ്ഞെടുപ്പില്‍ ഇന്ത്യയിലെ ഇടതുപക്ഷ സാന്നിധ്യം അഞ്ചുസീറ്റിലൊതുങ്ങിയതിന് പിന്നാലെ രാജ്യത്തെ ഇടത് ഏകീകരണം ആവശ്യമാണെന്ന് വ്യക്തമാക്കി സി.പി.ഐ രംഗത്ത്. നിലവിലെ സാഹചര്യത്തില്‍ ഇടതു മുന്നേറ്റങ്ങളുടെ ഏകീകരണം ആവശ്യമാണ്. മറ്റു ചില ഇടതു പാര്‍ട്ടികളില്‍നിന്ന് ഇതു സംബന്ധിച്ച് അനുകൂല പ്രതികരണം ഉണ്ടായിട്ടുണ്ടെന്നും ഡല്‍ഹിയിലെ പാര്‍ട്ടി ആസ്ഥാനത്ത് നടത്തിയ വാര്‍ത്താസമ്മേളനത്തില്‍ ജനറല്‍ സെക്രട്ടറി സുധാകര്‍ റെഡ്ഡിയും മുതിര്‍ന്ന നേതാവ് ബിനോയ് വിശ്വം എം.പിയും അഭിപ്രായപ്പെട്ടു. സി.പി.ഐ ദേശീയ നിര്‍വാഹകസമിതി യോഗതീരുമാനങ്ങള്‍ വിശദീരിക്കുകയായിരുന്നു ഇരുവരും.
കോണ്‍ഗ്രസും ഇടതുപക്ഷവും ജനങ്ങളുടെ പ്രതീക്ഷയ്‌ക്കൊത്തുയരുന്ന വിധത്തില്‍ ബി.ജെ.പിക്ക് ബദലായി ഉയര്‍ന്നുവരാന്‍ കഴിഞ്ഞില്ല. എന്നാല്‍, ദീര്‍ഘദൃഷ്ടിയോടെ ഡി.എം.കെ മുന്‍കൈയെടുത്ത് തമിഴ്‌നാട്ടില്‍ പ്രതിപക്ഷ സഖ്യം ഐക്യം ഉണ്ടാക്കാനായി. ഇടതുപക്ഷം അപ്രസസക്തമാവുന്നത് രാജ്യത്തിന്റെ ഭാവിക്ക് ഗുരുതരമായ പ്രത്യാഘാതം ഉണ്ടാക്കും. ഈ സാഹചര്യത്തില്‍ ഇടതുപക്ഷ ഐക്യം അനിവാര്യമാണെന്നും നിര്‍വാഹകസമിതി വിലയിരുത്തിയതായി ഇരുവരും അറിയിച്ചു. ശബരിമല വിഷയം കേരളത്തില്‍ തിരിച്ചടിയുണ്ടാകാന്‍ കാരണമായെന്നും സമിതി വിലയിരുത്തി. 65 മണ്ഡലങ്ങളില്‍ മല്‍സരിച്ച സി.പി.എമ്മിന് മൂന്നുസീറ്റില്‍ മാത്രമാണ് വിജയിക്കാനായത്. രണ്ടെണ്ണം തമിഴ്‌നാട്ടിലും ഒന്ന് കേരളത്തിലും. സി.പി.ഐക്കും തമിഴ്‌നാട്ടില്‍ രണ്ടംഗങ്ങളെ വിജയിപ്പിക്കാനായി.