ന്യൂഡല്‍ഹി: അനധികൃത സ്വത്ത് സമ്പാദന കേസില്‍ ചോദ്യം ചെയ്യലിനായി ഇന്ന് ഹാജരാവാന്‍ റോബര്‍ട്ട് വദ്രയ്ക്ക് എന്‍ഫോഴ്‌സ്‌മെന്റ് ഡയരക്ടേറ്റ് നോട്ടിസ് അയച്ചു. ലണ്ടന്‍, ദുബൈ, രാജസ്ഥാന്‍, ഡല്‍ഹി എന്നിവിടങ്ങളില്‍ നിന്ന് സ്വത്തുകള്‍ സമ്പാദിച്ചതുമായി ബന്ധപ്പെട്ട കേസുകളിലാണ് അന്വേഷണം നടക്കുന്നത്.

ചോദ്യം ചെയ്യലിനായി വദ്രയോട് ഹാജരാവാന്‍ ഇ.ഡി ഇത് ഒന്‍പതാം തവണയാണ് ആവശ്യപ്പെടുന്നത്. ഇന്ന് രാവിലെ 10.30ന് ഇ.ഡിയുടെ ഡല്‍ഹി ഓഫിസില്‍ ഹാജരാവാനാണ് ആവശ്യപ്പെട്ടിരിക്കുന്നത്. തെരഞ്ഞെടുപ്പിന് മുന്‍പ് തന്നെ കോണ്‍ഗ്രസിനെ ആക്രമിക്കാനായി റോബര്‍ട്ട് വദ്രയുടെ കേസ് ബി.ജെ.പി നേരത്തെ ഉയര്‍ത്തിക്കാണിച്ചിരുന്നു. എന്നാല്‍ ബി.ജെ.പി രാഷ്ട്രീയ വേട്ട നടത്തുകയാണെന്നാണ് കോണ്‍ഗ്രസിന്റെ ആരോപണം. കേസില്‍ അറസ്റ്റ് ചെയ്യുന്നതിനെ വിലക്കികൊണ്ട് ഡല്‍ഹി കോടതി നേരത്തെ ഉത്തരവിട്ടിരുന്നു. എന്നാല്‍ അറസ്റ്റ് ചെയ്യുന്നത് വിലക്കി കൊണ്ടുള്ള ഉത്തരവ് റദ്ദാക്കണമെന്ന് ആവശ്യപ്പെട്ട് ഇ.ഡി ഡല്‍ഹി ഹൈക്കോടതിയെ സമീപിച്ചിട്ടുണ്ട്. ഈ ഹരജിയില്‍ മറുപടി നല്‍കാന്‍ ജൂലൈ 17വരെ വദ്രക്ക് കോടതി സമയം അനുവദിച്ചിട്ടുണ്ട്.

അതിനിടെ ചികിത്സയ്ക്കായി വിദേശത്തേക്ക് പോവാന്‍ അനുമതി നല്‍കണമെന്ന് ആവശ്യപ്പെട്ട് വദ്ര കോടതിയെ സമീപിച്ചു. വന്‍കുടലില്‍ മുഴയുണ്ടെന്നും വിദഗ്ദ ചികിത്സക്കായി ലണ്ടനില്‍ പോകാന്‍ അനുമതി നല്‍കണമെന്നും ആവശ്യപ്പെട്ടാണ് വദ്ര കോടതിയില്‍ അപേക്ഷ നല്‍കിയത്. വദ്ര കോടതിയില്‍ സമര്‍പ്പിച്ച മെഡിക്കല്‍ സര്‍ട്ടിഫിക്കറ്റിലാണ് ഇക്കാര്യം വ്യക്തമാക്കിയത്. കേസിന്റെ ഭാഗമായി പിടിച്ചുവച്ച പാസ്‌പോര്‍ട്ട് വിട്ടുകിട്ടണമെന്നും എന്നാലേ ചികിത്സയ്ക്കായി ലണ്ടനില്‍ പോകാനാകൂവെന്നുമാണ് വദ്രയുടെ അപേക്ഷയില്‍ പറയുന്നത്. വദ്രയുടെ അപേക്ഷയില്‍ ഡല്‍ഹി കോടതി ജൂണ്‍ മൂന്നിന് തീരുമാനമെടുക്കും. ഡല്‍ഹി ഗംഗാറാം ആശുപത്രിയിലെ മെഡിക്കല്‍ സര്‍ട്ടിഫിക്കറ്റുകളാണ് വദ്രയുടെ അഭിഭാഷകന്‍ ബുധനാഴ്ച കോടതിയില്‍ സമര്‍പ്പിച്ചത്. ചികിത്സയ്ക്കായി വിദേശയാത്രയ്ക്ക് അനുമതി നല്‍കണമെന്നും ഇത് അന്വേഷണത്തില്‍ നിന്നുള്ള ഒളിച്ചോട്ടമല്ലെന്നും അഭിഭാഷകന്‍ കോടതിയെ അറിയിച്ചു. അതേസമയം, വദ്രയുടെ അപേക്ഷയെ പ്രോസിക്യൂഷന്‍ ശക്തമായി എതിര്‍ത്തു.